Çanakkalä suğışlarınıñ berençe şähitläre iskä alındı
Çanakkalä suğışları waqıtında 1914nçe yılnıñ 3nçe noyabr’ könne ingliz häm franśuz flotları köymäläreneñ 16 minutlıq bombalawı näticäsendä Säddülbahir qal’ğasında şähit bulğan 5 ofiśer häm 81 soldat iskä alındı
Çanakkalä suğışları Gälibolu tarixi mäydan räislege tarafınnan Säddülbahir qal’ğasınıñ kerü urınında urnaşqan 3nçe noyabr’ şähitläre ziratında iskä alu cıyını ütkärelde.
Cıyında çığış yasawçı Çanakkalä suğışları Gälibolu tarixi mäydan başlığı İsmail Qaşdämir 1914nçe yılnıñ 3nçe noyabreneñ Çanakkalädä berençe şähitlär birelgän kön buluın äytte.
Bu datanıñ Çanakkalä öçen bik möhim buluına iğ’tibarnı yünältüçe Qaşdämir: "Bügen tağın ber qat sezneñ belän bergä şähitlärebez cirlängän şuşı urında alarnı häm xörmät belän, häm dä Allahınıñ yarlıqawı, räxmät burıçı belän iskä alabız. Bez Tarixi mäydan räislege bularaq Çanakkalädä şähit, gazıy bulğan böten watan ulların onıtmadıq, onıtmayaçaqbız häm kiläse buınnarğa da xörmätle xatirälären citkeräçäkbez. Bezgä şuşı cirlärne watan itkän barlıq ata-babalarıbıznıñ cannarı tınıç bulsın”, - dip äytte.
Annan soñ Çanakkalä suğışında şähit bulğan ğaskärilär öçen doğa qılınğannan soñ şähit käberlärenä protokol äğ’zaläre qanäfer çäçäklären saldı.
Biredäge cıyınnan soñ Çanakkalä dastanın tanıtu üzägendä "1915 Çanakkalä suğışları ğosmanlı üniformaları kürgäzmäse” açıldı.
