"Talibannıñ poziśiyäse nindi – monı küräçäkbez"

İlbaşı Räcäp Tayyip Ärdoğan Törkiyäneñ Äfğanstannı tiz arada torğızu öçen här yaqlap yärdäm itärgä äzer buluın belderde. Ul Bosniya-Gerśegovina häm Qarataw säfärennän soñ oçqıçta media ähellärenä interv’yu birde.  

Ärdoğan anda Äfğanstandağı waqıyğalarğa tuqtaldı. Ul älege ildäge prośessnıñ iğ’tibar belän küzätelep barıluı kiräklegen citkerde. “Berençedän, hiç şöbhäsez, Talibannıñ däwlät bulu yäisä däwlät belän idarä itü mäs’äläsendäge poziśiyäse nindi – monı küräçäkbez,”-dide ilbaşı.

Ärdoğan Törkiyäneñ 20 yıl Äfğanstanğa asqorma häm ösqorma qoruda yärdäm itüen xäterlätte.

“Äfğan xalqı bu qadär yökne kütärä almas. Bez Äfğanstannıñ berdämlege häm bötenlegenä yärdäm itärgä äzer. Ämma alar yağınnan da bu nisbättän uñay poziśiyäne kürüebez kiräk,”-dip söyläde Törkiyä ilbaşı.

Ärdoğan Törkiyäneñ Qabuldağı ilçelegeneñ ike atna êşçänlegen waqıtlıça Xamid Karzai aêroportında alıp baruın citkerde. Xäzer xezmätkärlär qabat ilçelek binasına qaytqan.

“Plannarıbız diplomatik missiyäbezne däwam itü yaqlı. Här ixtimalgä qarşı al’ternativ plannarıbız bar. Xezmätkärlärebezneñ iminlege – östenlegebez,”-dide Törkiyä ilbaşı Ärdoğan.