Törkiyädä Sinovak vakśinası çığarılaçaq

Qıtay şirkäte Törkiyädä citeşterü ob'yektları açarğa cıyına

1661729
Törkiyädä Sinovak vakśinası çığarılaçaq

Sälamätlek saqlaw ministrı Fäxretdin Koca Qıtaynıñ Sinovak şirkäten Törkiyägä investiśiyä yasarğa çaqırdı. Ul firma wäqalätleläre belän videoêlemtä aşa aralaştı.

Ministr 2020nçe yılnıñ berençe könnärennän başlap böten dön’yanıñ Kovid-19 kizüe belän köräşüen xäterlätep: “Törkiyä bu çorda ilbaşıbız xörmätle Räcäp Tayyip Ärdoğan liderlığında uñışlı idarä itte. Köçle sälamätlek asqormabız häm üzen xezmätenä bağışlağan mediśina belgeçlärebez bu çorda bezneñ iñ zur ışanıçıbız buldı,”-dide.

Ul Kovid-19 kizüeneñ dön’ya külämendä xezmättäşlekneñ ähämiyäten tağın ber tapqır kürsätüen, illär arasındağı mönäsäbätlär öçen zur sınaw buluın assızıqladı.

“Xäzer bu xezmättäşlekne ber adımğa alğa cibärergä telim: sezne häm şirkätegezne vakśina çığaru mäs’äläsendä Törkiyägä investiśiyä yasarğa täq’dim itäm. Sälamätlek saqlaw ministrı bularaq ilebezgä kertemnäregezdä barlıq yärdämgä äzer buluıbıznı da belderergä telim,”-dide

Sinovak şirkäte wäqalätleläre isä citeşterü häm taratu quäten niçek lokal’läşterü turında söyläşülär tormışqa aşırıluın belderde.  

“Sinovaknıñ teläge Törkiyädä barı cirle citeşterü quäten barlıqqa kiterü häm ob’yektlar tözü öçen investiśiyä kertü tügel, moña östämä bularaq yañadan kilep çıqqan variantlarnı tikşerü öçen virusnı küzätü êşçänleklärenä yärdäm itü,”-di firma wäqalätleläre.

Sinovak şirkäte törek ğalimnäre belän xezmättäşlek külämen tağın da arttırırğa teläwlären dä citkerde. Citeşterü ob’yektı tözü öçen êşçänlekne tizlätäçäklär.

Bügen Törkiyägä Qıtaydan belgeçlär törkeme kilüe kötelä. Alar investiśiyä qararı çığarğannan soñ, kiräkle dokumentlar imzalanaçaq.



Bäyläneşle xäbärlär