Ärdoğan: “Bez xoquqnı häm ğadellekne yaqlarğa däwam itäbez”

Törkiyä İlbaşı Räcäp Tayyip Ärdoğan Antaliya Diplomatiya Forumında çığış yasadı

1660873
Ärdoğan: “Bez xoquqnı häm ğadellekne yaqlarğa däwam itäbez”

İlbaşı Räcäp Tayyip Ärdoğan xalıqara cämäğätçelekneñ yaña tör koronavirus kizüeneñ cimergeç yoğıntıların idarä itüdä yaxşı imtixan birä almawın belderep:

"Berläşkän Millätlär Oyışması İminlek Şurası tarixnıñ iñ zur sälamätlek saqlaw krizisın 100 könnän soñ kön tärtibenä ala aldı. Kizü çorında yasalğan xatalarnıñ qabatlanmawı öçen vakśina millätçelegenä forsat birelmäwe bik möhim”, - dip äytte.

Ärdoğan Antaliya Diplomatiya Forumında yasağan çığışında yaña tör koronavirus (Kovid-19) kizüe barışında Törkiyäneñ 158 ilgä häm 12 xalıqara oyışmağa sälamätlek materialın cibärüen äytep: "Yıl axırınnan êlek beterüne planlaştırğan cirle vakśina êşçänlegebezne keşe häm global’ iğ’tibar belän alıp barabız. Cirle vakśinabıznı, inşallah, böten keşelek belän urtaqlaşaçaqbız”, - dip belderde.

"BMO İminlek Şurası belän bergä global’ sistemanıñ östenä salınğan töp qorılışlar çişeleşneñ tügel, problemanıñ ber öleşe. Bu instituśional’ strukturalar belän 21nçe ğasırdağı säyäxätebezne däwam itä almıybız”, - dip äytüçe İlbaşı Ärdoğan: "Yaqınça 8 milliard keşeneñ yazmışın Berläşkän Millätlär Oyışması İminlek Şurasınıñ daimi äğ’zase 5 ilneñ şäfqätenä qaldırıp bulmıy. 190 ilgä berniqadär waqıt östäldä utıru xoquqın birgän, läkin üz yazmışı belän bäyle tawış xoquqın birmägän sistema ğadellek kiterä almıy. Ğädellek bulmağan urında bäreleş, kiyerenkelek häm qırıslıq kim bulmıy. Bez xoquqnı häm ğadellekne yaqlarğa däwam itäbez, däwam itäçäkbez”, - dip äytte.

İlbaşı çığışında Törkiyäneñ 252 tışqı wäkilçelege belän dönyanıñ iñ kiñ 5nçe diplomatik çeltärenä iyä il buluın da belderde.

Terrorçılıq belän köräş mäs’äläsendä isä Süriyädä êşçänlek alıp barğan PKK, YPG, DEAŞ kebek terror oyışmalarına qarşı mäydanda köräş alıp barğan berençe ilneñ Törkiyä buluına basım yasawçı Ärdoğan:

"DEAŞnıñ 4 meñ 500 äğ’zasen bez täêsirsez xälgä kiterdek. Bügengä çaqlı 430 meñ Süriyäleneñ tuğan cirlärenä qaytuın bez täêmin ittek. Alarnı çatırlardan qotqarabız. Briket yortı kebek proyektlarğa bulışlıq itäbez.

İlebezdä tınıç xalıqnı ütergän başkisärlär säyäsi status birelep yıllar buyı yaqlandı. Kön’yaq çigebez buyınça terror däwläte tözelergä tırışıldı. Süriyädä tınıçlıq häm totrıqlılıq urnaştırıluı barı tik Törkiyäneñ genä tügel, barıbıznıñ da cawaplılığı”, - dip äytte.

Räcäp Tayyip Ärdoğan: "Könçığış Urta diñgezdäge ênergiya çığanaqlarınıñ qarşılıqlar urınına xezmättäşlekkä forsat buluı bezneñ qulıbızda. Aldıbızdağı çorda kompasnıñ ber ayağın Törkiyädä urnaştırıp, ikençese belän Afrikadan Latin Amerikağa, Tın okeanınnan Aziyağa qadär böten geografiyälärdä xezmättäşlekne arttırırğa telibez”, - dip äytte.



Bäyläneşle xäbärlär