“AQŞ ilbaşı Djo Bayden belän bik faydalı oçraşu ütkärdek"

Törkiyä ilbaşı Räcäp Tayyip Ärdoğan NATO sammitı qısalarında Bryussel’dä Amerika Quşma Ştatları ilbaşı Djo Bayden belän küreşep söyläşte.

Ärdoğan söyläşüdän  soň matbuğat oçraşuı ütkärde häm tübändägelärne citkerde:  “AQŞ ilbaşı Djo Bayden belän bik faydalı oçraşu ütkärdek. İke berlektäş häm strategik partnyerğa kileşä torğan räweştä turıdan turı dialog kanalların täêsirle häm daimi qullanu turında kileştek. Urtaq mänfäğät’lärgä iyä ölkälärdäge xezmättäşlek mömkinleklären konstruktiv räweştä qaradıq. S-400 raketa saqlanu sisteması belän bäyle moňarçı nindi fikerdä bulğan bulsaq şunı uq Baydenğa da citkerdem. F-35 mäs’äläsendä dä ber ük fikerne äyttem”.

İlbaşı Ärdoğan Törkiyä - AQŞ mönäsäbätlärendä çişep bulmıy torğan problema bulmawına da basım yasadı.

Ärdoğan Baydennı Törkiyägä çaqırğanın häm anıň da bu çaqıruğa uňay qarawın belderde.

Törkiyä ilbaşı NATOnıň Urta diňgezdän Qara diňgezgä, Awrupadan Aziyägä, ixtıyac bulğan här cirdä aktiv rol’ başqaruı kiräklegen assızıqladı.

İlbaşı üz çığışında Törkiyäneň çik ar’yağı operaśiyälärenä dä tuqtaldı.

“Çik ar’yağı operaśiyälärebez yärdämendä 8 meň 200 kvadart kilometrdan kübräk mäydannı terrordan çistarttıq. NATO sammitındağı söyläşülärdä “PYD/ PKK” separatist terror oyışmasına yärdäm kürsätüne tuqtatu kiräklegen açıq räweştä belderdek. Telägebez – barlıq berlektäşlärebezneň säyäsi isäp xisaplarnı çitkä quyıp Törkiyägä teläktäşlek kürsätüläre” dide ilbaşı Ärdoğan.