Rusiyälelär Törkiyägä oçışlar başlanuın kötärgä buldı

Rusiyä turoperatorlar assośiaśiyäse räise Mayya Lomidze oçışlar tuqtatılu säbäple aprel’ häm mayda Törkiyädä yal itä almawçı turistlarnıñ kübeseneñ baru urının üzgärtmäwen belderde.

“Xäzerge kürsätkeçlärgä qarağanda, Törkiyägä barırğa cıyınğan Rusiyä turistlarınıñ yaqınça 15%ı yal itü öçen il êçendäge urınnarnı sayladı, yaqınça 18-20%ı isä Kuba häm başqa illärgä üzgärtte. Qalğan 60% tiräse başqa waqıtta Törkiyägä barırğa dip kötä, ömet itä,”-dide ul.

Lomidze aprel’-may çorı öçen rusiyälelärneñ Törkiyägä 500 meñ tur satıp aluın belderde. Xäzergä Rusiyä êçendäge yal urınnarına 50-60 meñ keşe östälgän.

İsegezgä töşeräbez, Rusiyä viśe-prem’yerı Tat’yana Golikova 12nçe aprel’dä yasağan belderüendä Törkiyä belän ike aradağı oçışlarnı 15nçe aprel’dän 1nçe iyün’gä qadär çikläw qararı çığaruların äytte.