Liviyädä törek korabın totqarladılar
Anı Xalifä Xafter köçläre qulğa alıp portqa kiterä
Liviyäneñ Misrata şähärenä daru iltüçe törek korabın Xalifä Xafter köçläre totqarladı. Köymädäge 17 keşelek êkipajnıñ 9ı törek, 7se hind, 1se azärbaycanlı.
Liviyäneñ könçığışındağı qanunsız qorallı köçlärneñ liderı Xalifä Xafternıñ wäkile Äxmät Äl-Mismari beldergänçä, Jamayka bayraqlı häm xucası törek buluı açıqlanğan “Mebruka” yök köymäse yänäse tıyılğan zonağa kergän häm yasalğan çaqırularğa cawap birmägän. Köymäne totqarlap Ras äl-Xilal portına kitergännär.
Belderüdä korabnıñ diñgezçelek qağıydälären bozuı häm şunıñ öçen soraştıru häm kontrol’ ütkäreläçäge äytelä. Monnan tış, Mismari ber telekanalğa reportajında köymäneñ Misratağa baruın häm darular töyälgän buluın, ämma tıyılğan urınğa kerülären söyläde. Ul köymägä çaqıru yasawların, tik cawap kilmäwen dä äytte.
“Şunnan soñ bez köymälär belän yaqınlaşıp korabqa mendek. Anda bernindi dä qoral bulmawı açıqlandı. Barı tik darular ğına töyälgän. Kapitan tiyeşle prośeduralarnı ütmäde häm röxsätsez tıyılğan urınğa kerde,”-di ul.
Köymäneñ xucaları totqarlağan yaq belän êlemtägä kergän. Êkipajnıñ xäle yaxşı buluı da açıqlandı. Kayber çığanaqlardan bilgele bulğança, korabnı qulğa töşerü turında süz barmıy, barı yalğış cirgä kerüläre öçen ştraf tülätäçäklär.
