Şuşanıñ qotqarıluına - Törkiyädä qotlawlar
Şuşa şähäre 28 yıldan soñ Ärmänstan okkupaśiyäsennän qotqarıldı
Tawlı Qarabaxtağı Şuşa şähäreneñ 28 yıldan soñ Ärmänstan okkupaśiyäsennän qotqarıluına Törkiyädä dä söyendelär. Ber-ber artlı täbriknamälär urtaqlaştılar.
Törkiyä ilbaşı Räcäp Tayyip Ärdoğan Şuşanıñ qotqarıluın - yawlanğan territoriyäneñ qalğan öleşeneñ dä bäysezlekkä ireşügä yaqın buluı kürsätkeçe dip belderde.
“30 yıl Minsk öçlese (Rusiya, AQŞ, Franśiyä) tarafınnan iğ’tibarsız qaldırılğan, aldanğan häm 30 yıl östäl artında bilgesez yazmışların kötep utırğan qardäşlärebez näticädä “sabır itkän ciñügä ireşer” dip sabır ittelär häm ciñügä ireştelär,”-dip söyläde ilbaşı.
“Adım-adım yawlaw astındağı şähärlärenä häm Qarabaxqa bäysezlek kiterüçe azärbaycanlı qardäşlärebezneñ söyeneçe bezneñ dä söyeneçebez,”-dide Ärdoğan.
Törkiyä Böyek Millät mäclese räise Mostafa Şäntop üz qotlawında: “Şuşa – Azärbaycannıqı. Xäyerle, möbaräk bulsın,”-dide. Ul Azärbaycan ilbaşı İlham Aliyevnıñ “28 yıldan soñ Şuşada azan tawışı yañğırayaçaq” digän süzlären dä xäterlätte.
Törkiyä ilbaşı yärdämçese Fuat Oktay ber telekanaldağı tapşıruda Azärbaycan armiyäseneñ ciñüen äytep uzdı: “Xakimiyät urnaştıruı Azärbaycan öçen bik ähämiyätle üseş, söyeneç,”-dide ul. Twitter akkauntında isä bolay dip yazdı: “Şuşa – Ärmänstan okkupaśiyäsennän qotqarıldı. Ciñüen qotlı bulsın, qardäşem!”
Törkiyä tışqı êşlär ministrı Mäwlet Çavuşoğlu üz belderüendä: “Azärbaycannıñ mädäni başqalası borınğı qala Şuşanıñ azatlığı qotlı häm unışlı bulsın,”-dide.
Bäyläneşle xäbärlär
Ärdoğan Rumıniyä däwlät başlığı belän söyläşte
Söyläşüdä Klaus Yoxannisnıñ NATO ğomum särqatibe wazıyfasına kandidatlığı da kön üzägendä ide