Putin Ärdoğannı maqtadı

"Ärdoğan  “êşlibez” dide häm êşlädek"

1514537
Putin Ärdoğannı maqtadı

Rusiyä däwlät başlığı Putin Törkiyä belän ike aradağı proyektlarnıñ ilbaşı Räcäp Tayyip Ärdoğannıñ täwäkällege näticäsendä tormışqa aşuı turında söyli. “Ärdoğan, basımnarğa qaramastan, bäysez tışqı säyäsät alıp bara,”-di ul.

Vladimir Putin videoêlemtä aşa Xalıqara diskussiya klubı Valdaynıñ cıyılışında qatnaşıp, sorawlarğa cawap birde. Süz Törkiyä belän Franśiyäneñ Könçığış Urta dingezdäge kiyerenkelege mäs’äläsenä dä kerde. Älege problemanı çişü öçen Rusiyä aradaşçı bula alamı - Putinnan şul xaqta beleştelär. Ul ileneñ Franśiyä belän dä, Törkiyä belän dä mönäsäbätläre barlığın äytte.

“Franśiyä belän, tulı köçle bulmasa da, yaxşı häm däwamlı mönäsäbätlärebez bar. Törkiyä belän xezmättäşlek üsä. Törkiyä bezneñ kürşebez. Törkiyä öçen dä, Rusiyä öçen dä bu bäyläneşlär ähämiyätle. Mondıy oçraqta ike däwlät arasında bezneñ aradaşçılığıbızğa ixtiyac barlığın uylamıym. Franśiyä häm Törkiyä şikelle illär mönäsäbätlären üzläre tözätä ala. Ärdoğannıñ poziśiyäse qatı şikelle kürensä dä, anıñ sığılmalı buluın beläm. Anıñ belän urtaq tel tabarğa bula. Şuña kürä, bu wäzğıyät’neñ yaxşıraçağın uylıym,”-dide Rusiyä däwlät başlığı.

Vladimir Putin Törkiyä belän ike aradağı mönäsäbätlär xaqında da söyläde. Säwdä äyläneşe 20 milliard dollardan artqan.

“İlbaşı Räcäp Tayyip Ärdoğan belän qısqa waqıt êçendä Törek ağımı proyektın tormışqa aşırdıq. Ämma Awrupa belän monı tiz räweştä êşli almıybız,”-dide Putin.

Ul Tön’yaq Ağım-2 tabiğıy gaz ütkärgeçe proyektın tormışqa aşıru mäs’äläsendä Awrupa belän qıyınlıqlar kilep çığuın xäterlätte. “Menä bit Törkiyä belän, tiskäre reakśiyälärgä qaramastan, üz milli mänfäğätlärebezne añlap, monı (Törek ağımı proyektın) bik tiz başqardıq. Ärdoğan  “êşlibez” dide häm êşlädek. Törkiyä xärbi-texnik xezmättäşlek tarmağında da S-400 sistemasın satıp alırğa qarar qıldı häm aldı. Mondıy xezmättäş belän êşläw künelle häm qurqınıçsız,”-dip söyläde Vladimir Putin.



Bäyläneşle xäbärlär