Ärdoğannıñ 30nçı avgust - Ciñü bäyräme belän qotlawı

Bügen Törkiyädä Ciñü bäyrämeneñ 98 yıllığın bilgeläp ütälär

1481431
Ärdoğannıñ 30nçı avgust - Ciñü bäyräme belän qotlawı

Törkiyä ilbaşı Räcäp Tayyip Ärdoğan 30nçı avgust  Ciñü bäyrämeneñ 98 yıllığı uñayınnan yullama yasadı. Ul dön’yanıñ törle poçmaqlarında yäşäwçe watandaşlarnı älege istälekle data belän täbrik itte.

“1919nçı yılda Samsunda ğazıy Mostafa Kämal Atatörek citäkçelegendä başlanğan bäysezlek köräşe 30nçı avgust Serğaskär mäydanı suğışında nıqlı ciñügä ireşä. Şunıñ belän xalqıbız bu cirlärneñ mäñgelek watanıbız buluın böten dön’yağa tağın ber qat iğ’lan itä. Bu ciñü başqalar tarafınnan tarixta kümelergä isäplänelgän millätneñ köllärennän tuuı, şanlanuı, tarix säxnäsenä qabat çığuı”.

Ul Könçığış Urta diñgezdä Törkiyägä mömkinlek qaldırmasqa tırışuçılar belän ber ğasır êlek törek cirlären basıp alırğa cilkenüçelärneñ ber uq ilbasarlar buluınıñ oçraqlılıq tügellegen dä äytte.

“Millätebez niçek, yuqlıq häm mömkinsezleklärgä qaramastan, bäysezlek köräşen cinügä qadär kitersä, bügen dä Zäñgär watandağı Sevr kileşüe xäwäsläre häm adımnarın kire qaytaruda hiç ikelänep qalmas. Bu mäs’älädä bezneñ ixtiyar köçebezgä häm ciñügä bulğan nıqlı ışanıçıbızğa berkem dä şiklänergä tiyeş tügel. Şuşı uylar belän cömhüriyätebezneñ tözüçese, Zur yawnıñ baş komandirı ğazıy Mostafa Kämal Atatörek häm fronttaşların räxmät belän iskä alam. Meñ yıllar buyı bu watannı saqlaw öçen ğomerlären qorban itkän barlıq şähitlärebezgä Allahtan yarlıqaw, weterannarıbızğa sawlıqlı, xozurlı ğomer telim. 30nçı avgust Ciñü bäyrämebez qotlı bulsın,”-diyelä ilbaşınıñ qotlawında.



Bäyläneşle xäbärlär