"Törkiyä qanunlı Liviyä xökümätenä teläktäşlegen däwam itäçäk"

Törkiyä ilbaşı idaräse süzçese İbrahim Kalın Törkiyäneñ Liviyädä qanunlı Tripoli xökümätenä teläktäşlegeneñ monnan soñ da däwam itäçägen belderde. Ul Anadolu agentlığına könüzäk mäs’älälär belän bäyle belderülär yasadı.

Kalın Törkiyäneñ Liviyä qanunlı xökümäteneñ taläbe buyınça dekabr’ ayında bu däwlät belän Xärbi xezmättäşlek häm qurqınıçsızlıq kileşüe imzalawın xäterlätte. “Bu kileşü qısalarında BMO tarafınnan da qabul itelüçe qanunlı xökümätkä teläktäşlek kürsätäbez. Anda Törkiyäneñ qatışı belän bäreleşlärneñ yomşatıluın härkem belä. Ägär ilbaşıbıznıñ bu aldan kürüçän qatışuı bulmasa, Liviyädä bäreleşlär tağın da tiränäyäçäk, tağın da küp keşe üläçäk häm, bälki, Liviyäneñ bülgälänüe qotılğısız xälgä kiläçäk ide,”-dide ul.  

Kalın beldergänçä, Serrac xökümäte tınıç çişeleş yulların sınap qaradı. Ämma Xafter yağı 2019nçe yılnıñ aprel’ ayında tözelgän Abu-Dabi kileşüennän birle, yäğ’ni yaqınça yıl yarım barlıq kileşü, utnı tuqtatu iğ’lannarı, solıx söyläşülären bozıp kilde.

Süzçe Liviyädäge utnı tuqtatu çaqıruı xaqında da söyläde. “Tripoli xökümäte, asılında, bu utnı tuqtatu çaqıruına qarşı tügel, tik anıñ däwamlı buluı öçen şartlar bar. Bolardan berse – härkemneñ 2015nçe yılda imzalanğan Sahirat kileşüendäge poziśiyälärenä kire çigenüe. Monıñ öçen Xafter köçläreneñ Sirtä häm Cufradan kitüe kiräk,”-dide Kalın.

Süzçe üz belderüendä Greśiyäneñ Urta diñgezneñ könçığışındağı xoquq bozuların da äytep uzdı. “Törkiyäne sanğa suqmıyça Urta diñgezneñ könçığışında ênergetika kartası häm säyäsi totrıqlılıq tözü mömkin tügel,”-dide ul.