İstanbulda ciñü bäyräme

Bügen İstanbulnıñ ciñep aluınıñ 567 yıllığı bäyräm itelä. Bu nisbättän Törkiyä ilbaşı Räcäp Tayyip Ärdoğan qatnaşında maxsus programma oyıştırıldı.

Başta Törkiyä cilkänle sport federaśiyäseneñ “29nçı may İstanbul buğazı xörmät kiçüe çarası” tormışqa aşırıldı. Anda milli sportçılar utırğan köymälär Huber rezidenśiyäseneñ qarşınnan uzıp ilbaşı Ärdoğannı sälamläde.

Topkapı sarayı yanında tağın ber maxsus programma xäzerlänä. Dön’yadağı iñ borıñğı häm zatlı armiyä orkestrı – Milli saqlanu ministrlığınıñ Mexteran berlege häm sänğat’çe Arslanbäk Soltanbäkov täwge tapqır bergä çığış yasıy.

İlbaşı idaräse häm êlemtä idaräseneñ Youtube kanalları häm sośial’ media akkauntları aşa Törkiyä waqıtı belän säğat’ 19.00da İstanbulnıñ ciñep aluına bağışlanğan maxsus konśert bulaçaq.  

Kiçke säğat’ 7gä, şulay uq, Uqçılar waqıfınıñ Fätix kuboğı çarası bilgelängän. Ul Qor’än-ı Kärimneñ Fätix doğasın uqu belän başlanaçaq. Çarada tradiśion törek uqçılığı yarışı finallarınıñ büläkläw tantanasın ütkärü qaralğan.

Kiçke säğat’ 20 tulıp 53 minıtta utlar şowı häm feyerverk başlana. İlbaşı Ärdoğan älege çarada videoêlemtä yärdämendä qatnaşaçaq.

Bäyräm ruxı 21 säğat’ 30 minutta Ayasofyada däwam itä. Anda mädäniyät häm turizm ministrlığı oyıştırğan küñel açu arası kötelä.

Programma Fatix Soltan Mäxmätneñ İstanbulnı yawlap alğanda köymälärne cir östennän küçergän marşrutnı uzıp Ayasofyağa kilgän dron videosı belän başlanaçaq.  

 Ayasofya êçendä isä Fätix süräse yañğırayaçaq. Tarixi bina qarşına quyılğan platformada isä İstanbulnı cinep alu temalı räsem şowı bula.

Ciñü bäyräme tarixi yarımutrawdağı salyut belän tögällänäçäk.

Böten programmanı Youtube häm televideniye kanalları aşa turıdan-turı êfirda qarap bulaçaq.