Onıtılmas faciğalär

Bügen - qırım tatarları, 21nçe may çärkäslär sörelgän kön

1419359
Onıtılmas faciğalär

76 yıl êlek bu könne qırım tatarları tuğan cirlärennän yolqıp alındı. Alarnı keşeleksez şartlarda vagonnarğa töyäp sörgengä cibärdelär. Älege data uñayınnan Törkiyä tışqı êşlär ministrlığı süzçese Hami Aksoy belderü yasap, qardäş millät – qırım tatarları häm Kavkaz xalıqlarına teräk buluların däwam itäçäklären äytte.

Ul 250 meñ qırım tatarınıñ yulda häm sörgendä ülüen, 1944 nçe yılda quılğannan soñ, distälägän yıllar buyı tuğan tufraqlarına qayta almawların assızıqladı.

Aksoy beldergänçä, Törkiyä qırım tatarları çikkän zolımnarnı beterü, alarnıñ tamırların saqlap isän-saw häm iminlektä yäşäwläre öçen tırışlıq quyaçağın söyläde. “Bu nisbättän, bez Ukrainanıñ territorial’ bötenlegen yaqlawıbıznı tağın ber qat assızıqlıybız,”-dide ul.

Aksoy 156 yıl êlek bulğan häm bik küp yuğaltularğa kitergän çärkäs sörgenen dä xäterlätte. Kavkaz xalıqları 21nçe mayda üz yortların taşlap kitärgä mäcbür itelgän könne zur faciğa bularaq iskä ala.  

“Tuğandaş qırım tatarları häm qardäş Kavkaz xalıqlarınıñ qayğıların urtaqlaşabız, urtaq xäterebezdän çıqmas êzlär qaldırğan bu faciğale waqıyğalarda ğomere özelüçelärgä Allahtan yarlıqaw sorıybız häm xatiräläre qarşında xörmät belän baş iyäbez,”-dide Hami Aksoy.



Bäyläneşle xäbärlär