"Ruslar belän älegä telägän noqtağa kilmädek"

Törkiyä tışqı êşlär ministrı Mäwlet Çavuşoğlu Süriyä mäs’äläsendä Rusiyä belän älegä telägän noqtağa kilä almawların belderde. Wäqaltle zat Törkiyä radio-televideniye kompaniyäseneñ turıdan-turı êfirında könüzäk temalarğa tuqtaldı.  

Çavuşoğlu Süriyädä Bäşşar Äsäd rejimınıñ höcümçänlege artuına qağılışlı bolay dide: “Rejim İdlibtä qansızlarça höcüm itä. (Rusiyä belän täêmin itelgän) Soçi häm Astana kileşüläre ğamäldän çıqtı dimim, ämma çatnawın äytä alam”.

Çavuşoğlu törek häm rus delegaśiyäläreneñ İdlib söyläşülärendä Soçi kileşüeneñ niçek tormışqa aşırılacağı turındağı fikerlären Rusiyä tarafına citkerülären belderde.

“Xäzerge waqıtta fiker törlelekläreneñ buluı döres. Sonğı cıyılışta tağın beraz yaqınayu buldı. Älegä näq’ telägän noqtada tügelbez. Qabat oçraşular däwam itärgä mömkin, bälki liderlar däräcäsendä dä cıyılış uzar,”-dide ministr.

Çavuşoğlu rejimnıñ İdlibtä qoraldan çistartılğan töbäkne sanğa suqmawın Mäskäwgä citkerülären äytte. “Bu höcümnärne tuqtatu öçen närsä kiräk bulsa, şunı êşläyäçäkbez,”-dide ul.

Ministr äytüençä, rejim häm yärdämçeläre Deradan qayber radikal’ törkemnärne İdlibkä kiterep attı häm bu terrorçılarnı säbäp itep töbäkkä höcüm itärgä cıyına.