"Söläymaninıñ üterelüe - region öçen xäwef kiterde"

Törkiyä tışqı êşlär ministrı Mäwlet Çavuşoğlu Qudüs köçe komandirı, iranlı general Qasıym Söläymaninıñ AQŞ höcümendä üterelüeneñ region totrıqlılığına citdi yanaw barlıqqa kiterüen assızıqladı.

Ministr 2019nçı yılğı tışqı säyäsätne bäyäläw utırışı oyıştırdı. Üz çığışında ul regiondağı soñğı waqıyğalarğa tuqtaldı.

Çavuşoğlu iranlı generalnıñ üterelünennän soñ artqan kiyerenkelekneñ xätär buluın belderde. “Bu mäs’äläneñ çişelüe yäisä kiyerenkelekneñ kimüe öçen kiläse könnärdä dä başqa däwlätlär belän bergä tırışlıq quyaçaqbız,”-dide ul.

Ministr qızıqsınuçı barlıq yaqlar belän êlemtädä buluların assızıqladı. Törkiyä ilbaşı Räcäp Tayyip Ärdoğan Franśiyä, İran, Ğıyraq häm Katar liderları belän telefonnan söyläşte. Angliyä xökümäte räise Boris Djonson, Germaniyä kanślerı Angela Merkel’ häm başqa däwlätlärneñ citäkçeläre belän êlemtägä kerüe kötelä.

Çavuşoğlu çärşämbe könne Rusiyä däwläte başlığı Vladimir Putinnıñ İstanbulğa kiläçägen xäterlätte. Anıñ belän dä könüzäk mäs’älälär urtağa salıp söyläşenäçäk. “Monda barıbıznıñ urtaq borçuı - Ğıyraqnıñ başqa illär öçen bäreleş alanına äwerelüen buldırmaw. Bu region öçen bik citdi xäwef,”-dide ministr.