AQŞ sankśiyäläre cawapsız qalmayaçaq

AQŞ Törkiyägä qarşı sankśiyälär kertsä, Törkiyä cawapsız qalmayaçaq. Bu xaqta tışqı êşlär ministrı Mäwlet Çavuşoğlu belderde. Ul Katar başqalasında “19nçı Doxa forumı”nda qatnaştı. Ministr moderator Ayman Mogeldinnıñ könüzäk temalarğa sorawlarına cawap birde.

Çavuşoğlu, Törkiyä-AQŞ mönäsäbätlärenä tuqtalıp, ike däwlätneñ berlektäşlär buluın häm ilbaşı Donal’d Tramp belän aralarnıñ çağıştırmaça yaxşıruın söyläde. Ämma, anıñ äytüençä, AQŞ kongressı belän qayber problemalar bar.   

Çavuşoğlu Amerikanıñ Rusiyädän alınğan S-400 hawa saqlanu sistemasına qarşı çığuın xäterlätte. Ul Törkiyäneñ mondıy saqlanu çarasına ixtiyacı buluın häm Rusiyädän yaxşı täq’dim yasaluı näticäsendä satıp aluın söyläde. Ministr AQŞnıñ S-400 säbäple sankśiyä kertergä cıyınuın äytep bolay dide: “Sankśiyälär häm yanawlar êşkä yaramayaçaq. AQŞ monı añlarğa tiyeş. Añlıydır dip uylıym. Tramp ta sankśiyälärgä qarşı çığa. Ämma sankśiyä kertelsä, Törkiyä moña cawap birergä mäcbür”.

Çavuşoğlu AQŞ senatınıñ 1915nçe yılğı waqıyğalar belän bäyle ärmän däğ’wäsen tanığan qarar proyektın qabul itüe xaqında da fikeren belderde.

“Tarix belän bäyle çikle mäğ’lümatları bulğan säyäsätçelär tarix turında xökem yörtmäskä tiyeş,”-dide ul häm bu qararnıñ, çınlıqta, ärmän lobbistları tarafınnan alğa sörelüen belderde.