Atatörekne iskä alu

Törkiyä cömhüriyätenä nigez salğan ğazıy Mostafa Kämal Atatörekneñ wafatına 81 yıl tulunı il külämendä törle çaralar belän iskä alalar.

Başqala Änkarada räsmi çaralarnıñ berençe adresı Anıtkabir buldı.

İlbaşı Räcäp Tayyip Ärdoğan citäkçelegendä däwlät êşlekleläre mavzoleynı zıyarät itte, istälek qaberenä çäçäklär quydı häm 1 minut tın tordı.

Törkiyä ilbaşı Anıtkabirneñ maxsus däftären imzaladı. Ärdoğan bu yullarnı yazdı:

“Bäysezlek suğışınıñ komandirı, cömhüeiyätebezneñ tözüçese, berençe ilbaşıbız ğazıy Mostafa Kämal Atatörekne baqıylıqqa küçüeneñ 81 yıllığında tağın ber qat räxmät belän iskä alabız. Märxüm Atatörek, suğışçan iptäşläre häm meñ yıl buyı bu cirlärne bezgä watan itü öçen köräşkän barlıq şähitlärebez häm veterannarıbıznıñ ğaziz xatiräläre millätebezneñ yörägendä gel yäşäyäçäk. Anıñ ämanäte bulğan cömhüriyätebezne mäñge yäşätü, üsterü, nığaytu öçen barlıq köçebezne quyaçaqbız. Ruxıñ şat bulsın!”

Atatörek küzlären mäñgelekkä yömğan urın - İstanbuldağı Dolmabahçä sarayına da irtänge säğat’lärdän başlap kilüçelär küp ide. Watandaşlar anda ber minut tın qaldı häm milli gimn “İstiklal’ marşı”n söyläde. Zıyarätçelär Atatörekneñ yatqan urını häm tirä-yağına aq häm qızıl qanäferlär saldı.

İl külämendä oluğ yulbaşçı Atatörek küzlären mäñgegä yomğan säğat’tä 9 tulıp 5 minutta sirenalar tawış birde, härkem ber minut tın qaldı. Yullardağı maşinalar tuqtadı, yörtüçelär tawış signalına basıp tordı.  

Kapadokiyada isä turistlarnı gizderüçe hawa şarlarına Törkiyä bayrağın häm Atatörekneñ räsemen êldelär.