Ärdoğan: “Bez kördlärgä doşman tügel”

Törkiyä İlbaşı Ärdoğan TRT Törkiyä teleradiokompaniyasınıñ turıdan-turı êfirında kön tärtiben bäyäläde.

Ärdoğan: “Terror oyışmasınıñ başında buluçılar belän Germaniya, Franśiya, AQŞ söyläşä. “Mazlum” kod isemle terrorçı qızıl byulleten belän êzlänä, Amerika Quşma Ştatları monı bezgä tapşırırğa tiyeş”, - dip äytte.

Törek qorallı köçläreneñ Süriyädä Färat yılğasınıñ könçığışında ütkärelgän häm annan soñ tänäfes iğ’lan itelgän “Solıx çişmäse” xäräkäten dä bäyäläwçe Ärdoğan: "Çişmälär anda (Färatnıñ könçığışında) küp bulğanı öçen bez moña “Solıx çişmäse” bulsın didek. “Solıx çişmäse” xäräkäte dä şuşı räweşle başlağan buldı”, - dip äytte.

"Bez kördlärgä doşman tügel, alar bezneñ qardäşlärebez. Bezneñ problemabız terrorçılar. Bez tözergä häm yañadan canlandırırğa kildek, cimerergä tügel”, - dip äytte.

Ärdoğan xäräkätneñ Ayn-äl Arab töbägen üz êçenä alaçaqmı yuqmı ikänlegeneñ täräqqiyätlärgä bäyle bulaçağın assızıqladı.

NATOda Törkiyäneñ strategik urtağı bulğan Amerika Quşma Ştatlarınıñ “PKK” separatist terror oyışmasına 30 meñnän kübräk yök maşinası belän qoral häm xärbi kiräk-yaraqlarnı täêmin itüen äytüçe İlbaşı: "Süriyädäge awır qorallarnıñ tiz räweştä arındırıluı yäisä bolarnıñ Törkiyägä tapşırıluı. NATOda bergä bit bez. Bolarnı bezgä birsennär”, - dip belderde.

Amerika Quşma Ştatları İlbaşı Donal’d Tramp belän samimi mönäsäbättä buluların da assızıqlawçı İlbaşı Ärdoğan 13nçe noyabr’däge çaqıruğa cawap itep wäkillek belän baraçağın da äytte.