“Operaśiya öçen çik buyında äzerleklär tämamlandı”

Törkiyä ilbaşı Räcäp Tayyip Ärdoğan Amerika Quşma Ştatlarına kitär aldınnan İstanbulda Atatörek isemendäge hawa mäydanında matbuğat oçraşuı ütkärde.

Ul:” 24 nçe sentyabr’dä Berläşkän Millätlär Oyışması ğomum şurasında çığış yasayaçaqmın. BMO kön tärtibendä urın alğan xalıqara tınıçlıq häm iminlek belän bäyle mäs’älälär xaqında fikerläremne citkeräçäkmen”,-dide.

Ärdoğan 2020 (sentyabr’) – 2021 (sentyabr’)  däweren üz êçenä alaçaq BMO 75 nçe ğomum şura räiselege wazıyfasına tulı wäqalätle ilçe Vokan Bozkırnı namzät itep kürsätülären belderde.

AQŞ belän strategik partnyer bulularn beldergän Ärdoğan bu xaqta tübändägelärne citkerde: “Bez NATOda bergä, ozaq yıllar strategik partnyerlıqnı däwam itterdek. AQŞ belän ber-berebezgä qarşı bulunı telämibez. Fäqät’ AQŞnıñ terror oyışmalarına yaqlaw kürsätüenä dä  küz yomıp qala almıybız. Anıñ “YPG/PKK” terror oyışmalarına yärdäm itüe kön kebek açıq”.

İlbaşı Färat yılğasınıñ könçığışındağı adımnarğa da tuqtaldı. “Bezne tınıçsız itüçe, töbäktä problema tudıruçı terror oyışmalarınnan bu cirlärne arındıraçaqbız” dide ul.

Törkiyä ilbaşı Räcäp Tayyip Ärdoğan Süriyäneñ tön’yağında “PKK” separatist terror oyışmasına operaśiya belän bäyle çik buylarında böten äzerleklärneñ tämamlanuın citkerde.   

Ärdoğan Amerika Quşma Ştatları belän “Patriot” hawa saqlanu sistemaları mäs’äläseneñ kön tärtibennän töşep qalğan mäs’älä bulmawın da assızıqladı.

Ärdoğan “Dönya 5 tän zurraq” süzeneñ barı tik Törkiyäneñ genä tügel, böten keşelek dönyasınıñ , Berläşkän Millätlär Oyışması ğomum şura äğ’zalarınıñ alşartı bulırğa tiyeşlegenä dä basım yasadı.