Ärdoğan könüzäk temalar buyınça belderülär yasadı

Törkiyä ilbaşı Räcäp Tayyip Ärdoğan Süriyädä Färat yılğasınıñ könçığışında terrorçılıq koridorın tar-mar itüdä qararlı buluların belderde. Ul AK partiyäneñ Änkarada uzuçı töbäk citäkçeläre kiñäytelgän cıyılışında çığış yasadı.

Ärdoğan 27nçe mayda Ğıyraqnıñ tön’yağındağı separatist terrorçı oyışma PKKğa qarşı başlanğan Pänçä xäräkäten dä telgä aldı. “Ğıyraqnıñ Ärbil şähärendäge konsullıq xezmätkärlärenä höcüm xäräkätebezneñ niqadär maqsatçan buluın kürsätte. Niyätebez terrorçılarnı çik sızığındağı tekä tawlar urınına çigebezneñ ar’yağındağı tigezlektä qarşılap yulların kirtäläwçe iminlek sızığı buldıru,”-dide ul.  

Ärdoğan AQŞ belän Süriyädä imin töbäk turında söyläşüläre xaqında isä: “Nindi näticä çığarılsa da, bez Färatnıñ könçığışındağı terrorçılıq koridorın yuqqa çığaru öçen qararlı,”-dide.

İlbaşı Rusiyädän alınğan S-400 hawa saqlanu sistemalarınıñ montaj häm instruktajlarınnan soñ 2020nçe yılnıñ aprelendä aktiv qullanuğa keräçägen belderde. Ä menä F-35 xärbi oçqıçları birelmägän oçraqta: “Qabat çaralar kürerbez, başqa cirdän êzlärbez,”-dide.

Ärdoğan Süriyä mäs’äläsendä fikeren citkerde. “Bügen töbäktäge çit köçlärgä ışanıp älläkem buluçılar irtägä cir astına keräçäk yäisä mäsxärägä qaluına riza bulaçaq,”-di ilbaşı.

Ul Törkiyäneñ äle xaman Awrupanıñ iñ yaqın, köçle, keremle häm yuğarı mömkinleklärgä iyä dustı bula aluın da äytep uzdı. “Awrupalılarnıñ da şul uq niyättä buluın kürü citärle. Bezgä ber adım yasağanğa bez 10 adımğa yaqınlaşırbız,”-dide Ärdoğan.