Ärdoğan Bosniya-Gerśegovinada

Törkiyä ilbaşı Räcäp Tayyip Ärdoğan Bosniya-Gerśegovina parlamentı räise Bakir İzätbegoviçnı qabul itte. Ul Sarayevoğa Awrupa xezmättäşlek prośessı sammitı öçen kitkän ide. Ärdoğannıñ biredä berençe oçraşuı İzätbegoviç belän buldı. Ul jurnalistlar öçen yabıq işeklär artında 40 minut bardı.

İlbaşı Ärdoğan Sloveniya däwlät başlığı Borut Paxor belän dä äñgämä qordı. Annarı Bolgariya xökümäte räise Boyko Borisovnı qabul itte.

Monnan tış, Törkiyä ilbaşı Bosniya-Gerśegovina däwlät idaräse şurası räise Milorad Dodik, şura äğ’zaları Şäfik Cafäroviç häm Zeljko Komşiç belän oçraştı. Söyläşü jurnalistlar öçen yabıq işeklär artında 1 säğat’ däwam itte.

Ärdoğan Srebreniśa genośidı qorbannarı istälegenä oyıştırılğan çarata qatnaştı. 24 yıl êlek teträndergeç qanlı waqıyğada üterelgän häm kümäk qaberleklärdän tabılğan 33 keşeneñ cäsäden kümü öçen konvoy belän başqaladan Potoçariğa iltälär. Anda qorbannar memorial’ ziratqa cirlänäçäk. Tabutlarnı taşuçı maşina däwlät idaräse şurası binası qarşınnan ütte.  

Ärdoğan häm şunda cıyıluçılar genośid qorbannarı öçen doğa qıldı häm maşinağa çäçäklär quydı.

Çaradan soñ Törkiyä ilbaşı üzenä zur iğ’tibar kürsätkän bosniyälelär belän fotoğa töşte.