"AQŞ tağın ber qat xalıqara xoquqlarğa tökerde"

AQŞ ilbaşı Donal’d Trampnıñ Süriyäneñ Golan qalqulıqların İzrail cirläre bularaq qabul itüe turındağı qararnı imzalawı Törkiyädä tiskäre reakśiyä tudırdı. Tışqı êşlär ministrı Mäwlet Çavuşoğlu sośial’ media aşa belderü yasadı. Ul älege qararnıñ İzrailneñ Golan qalqulıqlarındağı anneksiyäsen qanunlaştırmayaçağın assızıqladı. “AQŞ tağın ber qat xalıqara xoquqlarğa tökerde. Ämma bu qarar İzrailneñ Golan qalqulıqların basıp aluın berqayçan da qanunlaştırmas. Kiresençä, Yaqın Könçığıştağı tınıçlıq öçen tırışlıqlarğa kirtä bulıp, regiondağı kiyerenkelekne arttıraçaq,”- dide ministr.  

İlbaşı idaräse süzçese İbrahim Kalın isä AQŞnıñ Golan qalqulıqları qararınıñ tınıçlıqqa qarşı konfrontaśion fiker yörtüçe êşe buluın belderde. Ul: “Kem tarafınnan yaqlansa yaqlansın, basıp alu häm suğış säyäsäte qanunsız häm keşeleksez,”-dide.

AK partiyä süzçese Ömär Çälik fikerençä,  Trampnıñ imzası qanunğa sıyışmıy. “Golan qalqulıqları İzrail cire tügel, Süriyä cire, süriyälelärneñ cire,”-dide ul.  

Bilgele bulğança, Donal’d Tramp İzrailneñ Golan qalqulıqlarındağı xakimiyäten AQŞnıñ räsmi räweştä tanuın iğ’lan itüçe ilbaşı qararın imzaladı. Başqala Vaşingtonda uzğan tantanada İzrail xökümäte räise Bin’yamin Netan’yaxu da qatnaştı.

Tramp anda: “İzrailneñ Golandağı xakimiyäten tanıdım,”- digän süzlär äytte.

Süz uñayınnan, imza quyılğan mizgellärdä İzrail oçqıçları Ğazzäne bombalıy başladı.