"Kraysçerç üterüçese belän DEAŞ arasında ayırma yuq"

Törkiyä ilbaşı Räcäp Tayyip Ärdoğan Yaña Zelandiyädä 50 möselmannı ütergän terrorçınıñ üz manifestında Törkiyä häm şäxeseneñ bik küp tapqırlar iskä alınuınıñ mäğ’näwi buluın äytte. Ul AQŞta çığuçı “Vaşington Post” gazetına “Yaña Zelandiyä terrorçısı häm DEAŞnıñ tuqıması ber ük” digän mäqalä yazdı.

Ärdoğan anda cinayät’ qorallarınıñ öslärendä häm terrorçınıñ internetta bastırğan manifestında bik küp sanda tarixi sıltamalar buluına iğ’tibarnı cälep itte. Monnan tış, Törkiyäneñ häm üz isemeneñ telgä alınuı da uylanırğa êtärüen assızıqladı.  Ärdoğan yazğança, üterüçe, dön’ya tarixı häm xristianlıq inanuın bozıp kürsätep, yalğış qaraşların qanunlaştırırğa mataşa.

“Keşelär arasına näfrät orlıqların çäçärgä tırışa. Ütkändä küp tapqırlar terrorçılıqnıñ dine, tele yäisä rasası yuqlığın söylägän lider bularaq ütkän atnadağı terrorçı höcümnären xristian cämäğatenä, äxlağına yäisä priñśiplarına bäylärgä yünältelgän härtörle talpınunı qatğıy räweştä kire qağam. Yaña Zelandiyädä bulğannar barı tik belemsezlek häm näfrätneñ ağulı çığışı dip bäyälänä ala,”-dip yaza Ärdoğan üz mäqaläsendä. Häm bolay dip däwam itä: “Millätebez tarixnıñ terrorçılar tarafınnan bozıp kürsätelüe belän täwge tapqır bu waqıyğada oçraştı. Tarixnı radikal’ ideologiyäseneñ küzlegennän çığıp añlatuçı häm kübese möselman bulğan meñnärçä keşene ütergän DEAŞ terrorçı oyışması soñğı yıllarda İstanbulnı basıp alu öçen çaqıru yasağan ide.  Bu Kraystçerç höcümçeseneñ manifestında urın alğan “şähärne qabat xristianlaştıru” turındağı süzläre belän oxşaş. DEAŞ, şul räweşle ük, Törkiyä cömhüriyäten yuqqa çığarırğa da süz birgän ide. Törek xärbiläreneñ Süriyädä terrorçı oyışmasına bu qadär awır höcümnär oyıştıruınıñ säbäplärennän berse dä näq’ şul”. İlbaşı Yaña Zelandiyädä ber ğayepsez keşelärneñ ğomeren özgän üterüçe belän Törkiyä, Franśiyä, İndoneziyä häm başqa urınnarda terrorçı höcümnäre oyıştıruçılar arasında bernindi ayırma bulmawın assızıqlıy.

Ardoğan Könbatış liderlarınıñ bu waqıyğadan soñ qayber cawaplılıqlarnı añlawı kiräklegen dä belderde. Ul cämäğat’çelek häm xökümätlärne soñğı yıllarda artqan rasaçılıq, ksenofobiyä häm islamofobiyä şikelle ideologiyälärneñ norma şikelle kürenüenä yul quymasqa çaqırdı.

“Könbatış liderlarınıñ Yaña Zelandiyä xökümäte räise möxtäräm Jasinda Ardernnıñ qıyulığı, köçe häm samimilegennän sabaq alıp üz illärendä yäşäwçe möselmannarnı qanatları astına aluı kiräk,”-dide Törkiyä ilbaşı “Vaşington Pıost” gazetında çıqqan mäqaläsendä.