"S-400 mäs’äläsendä bez êşne tögällädek"

Ärdoğan Rusiyä belä kileşüdän kire qaytmayaçağın belderde

1158555
"S-400 mäs’äläsendä bez êşne tögällädek"

Törkiyä ilbaşı Räcäp Tayyip Ärdoğan Rusiyädän S-400 hawa saqlanu sistemaların aludan kire qaytu bulmayacağın belderde. “Ruslar belän kileştek, urtaq citeşterü başlıybız, S-400dän soñ bälki S-500gä kereşerbez,”-dide ul. İlbaşı älege temanı ber telekanaldağı tapşıruda kütärde. Anda saqlanu sisteması mäs’äläsendä qayberäwlärneñ Törkiyägä basım yasawı belän bäyle soraw buldı. Ärdoğan bolay dip cawap birde: “S-400 mäs’äläsendä bez êşne tögällädek, ul inde bulğan närsä. Anı söyläşüdän mäğ’nä yuq. Çönki xörmätle Putin belän dä, Rusiyä xökümäte belän dä kileşü tämamlanğan xäldä. Yäğ’ni kredit şartlarınnan başlap urtaq citeşterügä qadär barısı söyläşende, kileşende, qullar quyıldı. Xäzer monnan kire qaytu bulmayaçaq. Çönki bezgä mondıy äxlaqsızlıq kileşmäs, bu äxlaqıy adım tügel”.

Ärdoğan ruslar belän S-400ne urtaq çığaru mömkinlegen dä äytep uzdı. “S-400dän soñ bälki S-500gä kereşerbez. Bezgä S-400dä törtterüçelär ni öçen S-300ne alğan Greśiyägä süz äytmi? Nigä Bolgariyägä äytmi? Slovakiyägä nik äytmi? Bolar da NATO däwläte, alarğa da äytegez, nigä äytmisez?”-dide ul.  

Törkiyä ilbaşı NATO ğomum särqatibeneñ S-400ne alu belän bäyle räweştä: “Bu urtaqlarıbıznıñ iñ tabiğıy xoquqı, bez aña tıqşına almıybız,”-digän süzlären citkerde. Ärdoğan, şulay uq, S-400lärneñ berençe partiyäse iyül’dä kiläçägen äytte.  



Bäyläneşle xäbärlär