Ärdoğan belän Tramp oçraşuı

AQŞ däwlät başlığı Donal’d Tramp Argentinadağı G20 sammitında ilbaşı Räcäp Tayyip Ärdoğan belän oçraşaçaq. Bu xaqta Aq Yort milli iminlek kiñäşçese Djon Bolton jurnalistlar belän oçraşuda xäbär itte. Ul sammitqa barğan cirdän Trampnıñ Argentina, Qıtay, Rusiyä, Germaniyä, Yaponiyä, Hindstan häm Kön’yaq Koreya liderları belän oçraşaçağın belderde.  Ärdoğan belän küreşü dä şular arasında. Ä menä AQŞ ilbaşınıñ Soğud Ğaräbstanı täxet varisı prinś Möxämmät bin Sälman belän oçraşuı planlaştırılmağan.

Bolton Trampnıñ Qaşıqçı cinayäte belän bäyle audioyazmanı tıñlawı yäisä tıñlamawı turındağı sorawğa: “Yazmanı tıñlamadı. Ğaräpçä bulğanı öçen tıñlasa da añlamas ide, barı tärcemäsen uqıdı,”-dip cawap birde.

 Sonraq Aq Yort süzçese Sara Sanders räsmi programması tışında Trampnıñ Soğud Ğaräbstanı prinśı belän oçraşu ixtimalı buluın äytte.

Monnan tış, Sanders: “Qaşıqçı êşendä älegä soñğı dälillärne kürmädek. Yana dälillärne kürgäç, aña qarap fiker beldererbez,”-dide.