İstanbul aêroportı açıldı

İlbaşı Räcäp Tayyip Ärdoğan İstanbulda yaña salınğan, dönyanıñ iñ zur hawa mäydanınıñ isemeneñ İstanbul buluın açıqladı

1077789
İstanbul aêroportı açıldı

Ärdoğan yaña aêroportnıñ açılışın oyıştırılğan kürkäm tantana belän yasadı.

Ärdoğan çığışında İstanbul hawa mäydanınıñ Törkiyägä häm dönyağa xäyerle buluın teläde.

Däwlät başlığı şuşı dulqınlandırğıç köndä Törkiyäneñ yanında urının alğan 50gä yaqın ildän kilgän qunaqlarğa räxmätlären citkerde.

Tantanada Albaniya Däwlät başlığı Ilir Meta, Qatar Ämire Şäyex Tamim Bin Hamad Al-Thani, Qırğızstan İlbaşı Sooronbay Jeenbekov, Kosova Däwlät başlığı Haşim Thaçi, Tönyaq Kipr Törek Cömhüriyäte İlbaşı Mostafa Aqıncı, Makedoniya Däwlät başlığı Gjorge Ivanov, Moldova Cömhüriyäte Prezidentı Igor Dodon, Paqıstan İlbaşı Arif Alvi, Serbiya Däwlät başlığı Aleksandar Vucic, Sudan İlbaşı Feldmareşal Omar Hassan Ahmad Al Başir, Bosniya-Hersegovina Ministrlar Şurası başlığı (baş ministr) Denis Zvizdic, Bolgariya baş ministrı Boyko Borisov, Kongo Demokratik Cömhüriyäte baş ministr urınbasarı häm transport belän êlemtädän cawaplı ministrı, Sloveniya baş ministr urınbasarı häm asqorma ministrı Alenka Bratusek, Görcestan (Gruziya) tışqı êşlär ministrı David Zalkaliani (wäkillek başlığı), İran tışqı êşlär ministrı Cävad Zarif (delegaśiya başlığı), Moldova Cömhüriyätenä bäyle Gagauz üzidaräle cirlekneñ başlığı Irina Vlah qatnaştı.

Açılış tantanasında İlbaşı Ärdoğannan aldan süz alğan Törkiyä Böyek Millät Mäclese başlığı Binali Yıldırım: “Tözelüeneñ 95 yıllığında Cömhüriyätebezneñ dan-şöhrätenä, şanına kileşep torğan şuşı äsär ilebezi millätebez häm töbägebez öçen xäyerle häm uñaylı bulsın”, -dip äytte.

Açılışqa milli häm xalıqara media organnarı da zur iğ’tibar kürsätte.

Biğräk tä çit il matbuğat wäkilläre miğmarise, arxitekturası belän zur soqlanu uyandırğan aêroport belän bäyle reportajlar da yasadı.

Tantanağa säyäsät, sänğät, sport häm êş dönyası ähelläre dä çaqırıldı.

Fänär grek patriarxı Bartholomeos, Törkiyä yähüdilär ravvinı İsak Haleva, Süryani pravoslav çirkäwe metropolitı Yusuf Çätin dä açılış ütkärelgän mäydanda üz urınnarın aldı.



Bäyläneşle xäbärlär