Ciñü bäyräme tantanaları

30nçı avgust Ciñü Bäyrämeneñ 96 yıllığı Törkiyä külämendä häm çit illärdäge wäkilleklärdä bilgeläp ütelde.

Başqala Änkaradağı tantanalar Anıtkabirdä başlandı. İlbaşı Räcäp Tayyip Ärdoğan häm başqa xökümät wäkilläre Atatörkneñ mavzoleyena çäçäklär quydı. Qatnaşuçılar böyek yulbaşçını ber minut tınlıq belän iskä aldı.  Tantanada “İstiklal marşı” yañğıradı.

Ärdoğan Anıtkabirneñ istälek däftären imzaladı. Ul moxtaclıq, yuqlıq, awırlıqlarğa qaramastan Bäysezlek suğışında kürsätelgän qaharmanlıqnıñ, üz-üzeñne ayamawnıñ näticäse bulğan bu şanlı ciñüneñ - törek tarixınıñ altın bitlärennän berse ikänen söyläde. Ärdoğan törek xalqınıñ här çorda bäysezlekne ğomeren fida itep saqlawın assızıqladı. “Däwlätebezneñ suverenlığına qarşı soñğı waqıtlarda artqan yanaw, sanğa suqmaw häm höcümnär bezne ideallarıbız häm maqsatlarıbızdan çitläştermäyäçäk,”-dide ilbaşı.  

Qotlawlarnıñ çirattağı adresı  - İlbaşı kölliyäse. Ärdoğan Ciñü Bäyräme täbriklären generallisimus bularaq qabul itte.   

İlbaşı xärbi akademiyädä çığarılış tantanasında da qatnaştı. Üz çığışında ul Törkiyä qorallı köçlären barı tik qoralları, keşe köçe, fizik östenlege belän genä tügel, şul uq waqıtta tormış, dön’ya, Törkiyä öçen öslärenä alğan cawaplılıqqa qaraşları belän dä iñ yuğarı däräcägä ireşterergä qararlı buluların söyläde. Ärdoğan bu nisbättän bik zur üzgäreşlär kötelüen belderde.