Axäd Tämimi Törkiyägä räxmäten belderde

Fälästinneñ İzrail basıp alularına qarşılığınıñ simvolına äwerelgän 17 yäş’lek Axäd Tämimi Törkiyägä räxmäten belderde. Törek jurnalistlarına interv’yuda ul 8 ay törmädä utırğan waqıtta daimi räweştä mısqıllawlarğa häm soraw alularğa duçar buluın söyläde. Anıñ äytüençä, irekkä çıqqannan soñ iñ berençe şaltıratuçılardan berse ilbaşı Räcäp Tayyip Ärdoğan bulğan. “Ärdoğannıñ şaltıratuına bik şatlandım. Aña räxmät äyttem,”-di Tämimi. Ul töreklärne yaratuın, alarnıñ härwaqıt yannarında buluına söyenüen dä söyläde. “Barısına da bik zur räxmät. Fälästinneñ bäysezlege öçen bezgä tağın da nığraq yärdäm itülären telim,”-di qıyu qız.  

Tämimi 2012nçe yılda yodrığın qısıp İzrail xärbiyenä qarşılıq kürsätkändä barı tik 11 yäşendä ide. Änisen qulğa alırğa mataşuçılarnıñ qarşına çığıp qurıqmıyça basıp tordı. Bu waqıyğa kameralarğa da êläkte häm video böten dön’yanıñ iğ’tibarın cälep itte. 3 yıldan soñ anı abıysın cibärmiçä toruçı xärbineñ qulın barlıq köçe belän teşlägändä töşerep aldılar. Yordannıñ könbatış yarındağı Näbi salix awılındağı batır qız Axäd Tämimi uzğan yıl, İzrail xärbiyeneñ yañağına suğuda ğayeplänep, qulğa alındı häm 8 ay törmädä utırdı.