Ärdoğan İran, Rusiyä häm Germaniya citäkçeläre belän söyläşte

İlbaşı Räcäp Tayyip Ärdoğan Fälästindäge soñğı waqıyğalar belän bäyle bularaq İran däwlät başlığı Xäsän Ruxani, Rusiyä prezidentı Vladimir Putin häm Germaniya kanślerı Angela Merkel’ belän ayırım-ayırım telefonnan söyläşte.

Räsmi çığanaqlarğa kürä, Ärdoğan-Ruxani äñgämäsendä AQŞnıñ Tel’-Avivdağı ilçelegen Qudüskä küçerüe häm İzrail’ xärbiläreneñ Gazzädä fälästinlelärgä ut açuı näticäsendä töbäktäge kiyerenkelekneñ artuı telgä alındı.

İke lider da İslam xezmättäşlek oyışmasınıñ comğa könne İstanbulda uzaçaq ğadättän tış cıyılışınıñ möselmannarnıñ berdäm mönäsäbät kürsätüläre küzlegennän ähämiyätle buluın assızıqladı.  BMOda da bu mäs’äläneñ êzleklelegen täêmin itäçäklärenä basım yasadılar.   

İlbaşı Ärdoğan Rusiyä däwlät başlığı Putin belän söyläşüdä dä fälästinle demonstrantlarnıñ böten dön’ya qarşında räximsez höcümgä duçar bulularınıñ keşelek öçen xurlıq ikänen belderde.

Ärdoğan Germaniya kanślerı Merkel’ belän dä telefonnan söyläşte. Anda ike lider AQŞ ilçelegen Qudüskä küçerü häm Gazzädä fälästinlelärneñ utqa totıluı naticäsendä tuğan kiyerenkelek xaqında fiker alıştı. Bügenge wäzğıyät’neñ mäs’äläneñ çişeleşen tabunı awırlaştıruın belderdelär. Ärdoğan häm Merkel’ mönäsäbätlärgä tizlek birü häm töbäkara temalarğa fiker alışu öçen yaqın êlemtädä torırğa kileşte.