“Qudüs-Yerusalimneñ tarixi statusın saqlap qalırğa çaqıram”

Ärdoğan räsmi säfär belän Änkarağa kilgän Cibuti Däwlät başlığı İsmail Omar Guelleh belän qara-qarşı häm wäkilleklärara söyläşülärdän soñ İlbaşı qolliyäsendä urtaq matbuğat oçraşuın oyıştırdı.

Guelleh häm yanındağı wäkillek äğzalären Törkiyädä qunaq itüdän şat buluların belderüçe Ärdoğan 1977nçe yılda bäysezlegen qazanğan Cibutineñ bıyıl bäysezlegeneñ 40 yıllığın qotlawın xäterlätte. Ärdoğan: "Xörmätle İlbaşı küzlegennän böten Cibutili qardäşläremne täbrik itäm”, - dip äytte.

İlbaşı Guellehneñ härwaqıt yannarında buluın assızıqlawçı Däwlät başlığı Ärdoğan: "Üzläre 15nçe iyül’ xain tüntäreleş kereşüennän soñ şunda uq ilebezgä yaqlawın, millätebez belän teläktäşlegen anıq itep belderde. Cibuti – “Fätullahçı” terror oyışmasına qarşı kiräkle çaralarnı berençe bulıp kürgän duslarıbızdan. Xörmätle İlbaşı belän bergä böten Cibuti organnarına qabat şäxesem häm millätem isemennän räxmätläremne citkeräm”, - dip äytte.

İslam dönyasınıñ berlegenä, berdämlegenä häm teläktäşlegenä iñ küp ixtıyac xis itelgän könnärneñ yäşänüenä basım yasawçı Ärdoğan: "Bu çorda İslam illäreneñ, üz aralarındağı yasalma problemalarnı çitkä quyıp, berdäm buluı zarur. Däwlät başlığı xörmätle Guellehneñ şuşı säfären İslam illäre arasındağı teläktäşlekneñ, yärdämläşüneñ köçäytelüe cähätennän ähämiyätle dip küräm”, - dip assızıqlap äytep uzdı. 

İstanbulda ütkärelgän İslam xezmättäşlek oyışmasınıñ çirattan tış liderlar sammitında Cibutineñ dä premyer-ministr däräcäsendä qatnaşuına iğtibarnı yünältüçe Ärdoğan: "Qudüs-Yerusalimne yaqlap çıqqannarı öçen üzlärenä ayıruça räxmät äytäm,” – dip belderde.

İlbaşı Ärdoğan, İstanbulda här cähättän bik uñışlı yuğarı däräcäle oçraşu uzdıruların assızıqlap:

"Qudüs-Yerusalimneñ izgelegeneñ häm tarixi statusınıñ saqlanuı ölkäsendä kritik qararlar qabul ittek. Belüegezçä, mäs’älä Berläşkän Millätlär Oyışması däräcäsendä qaraldı. Qudüs-Yerusalimneñ tarixi statusın üzgärtäçäk şuşı qurqınıç adımnı totqarlaw maqsatınnan çığıp Berläşkän Millätlär Oyışması İminlek şurasına tapşırılğan qarar ölgese, qızğanıç, Amerika Quşma Ştatlarınıñ vetosına tağılıp qaldı. Qarar ölgeseneñ başqa 14 ilneñ barısı tarafınnan xuplanuı bik zur ähämiyätkä häm mäğnägä iyä. Xäzer inde, inşallah, bu ölgene BMO ğomum şurasına alıp baraçaqbız. Xalıqara cämäğätçelekneñ Ğomum şurada ğadellek-ğadälät, döreslek-xaqlıq häm tınıçlıq yaqlı köçle totış kürsätäçägenä ışanam. Ğomum şurada öçtä ikelek yaqlaw nigezdä Berläşkän Millätlär Oyışması İminlek şurasındağı vetonıñ näq’ kire qağıluı mäğnäsenä turı kiläçäk. Biredän tağın ber qat Berläşkän Millätlär Oyışması äğzase böten illärne Qudüs-Yerusalimneñ tarixi statusın saqlap qalırğa çaqıram. Törkiyä bularaq bu mäs’äläne axırına qadär küzätäçäkbez”, - dip äytte.