“Mönäsäbätlärne yañadan canlandıru bik möhim”

Törkiyä İlbaşı Räcäp Tayyip Ärdoğan "NATO däwlät häm xökümät başlıqları cıyılışı” öçen kitkän Bel’giya başqalası Bryussel’dä “NATO”nıñ yaña ştab binasında oyıştırılğan aş mäclesendä qatnaştı.

Amerika Quşma Ştatları İlbaşı Donal’d Tramp zalğa kergän çaqta yänä qızıqlı xäräkät räweşen kürsätte.

İlbaşı Ärdoğan häm Angliya Prem'yer-ministrı Tereza Mäyneñ söyläşep utıruın kürep alğan Tramp, uzğan çaqta küz qaraşların üzlärenä yünältep, ber mizgeldä äñgämälären tıñlap aldı.

Ärdoğan belän Tramp ta NATO ştabı binasın tapşıru tantanası aldınnan, qul qısışıp, äñgämä qorıp cibärgän ide.

İlbaşı Räcäp Tayyip Ärdoğan atnakiçen Awrupa liderları belän oçraşuları qısalarında Franśiya Däwlät başlığı Ämmanuêl’ Makron belän dä küreşep söyläşte.

Söyläşü waqıtında “PKK” häm “DEAŞ” belän bergä terrorçılıqnıñ här törlese belän urtaq köräşneñ möhimlegenä basım yasaldı.

Törkiyä-Franśiya mönäsäbätlären tağın da köçäytü mäs’äläsendä qatğılıqlarına iğtibarnı yünältüçe ike lider saqlanu sänäğätendä xezmättäşlek belän ber rättän ike yaqlı säwdä külämen 20 milliard yevroğa citkerü mäs’äläsendä dä urtaq fikergä kilde.

Ärdoğan häm Makron Törkiyä-Awrupa Berlege mönäsäbätlären yañadan tizlätü zarurlığın assızıqlap äytep uzdı.

Ärdoğan Törkiyä-Awrupa Berlege mönäsäbätläre qısalarında da söyläşülär ütkärde.

Törkiyä İlbaşı Awrupa Berlege şurası başlığı Donal’d Tusk häm Awrupa Berlege komissiyäse başlığı Jan-Klod Yunker belän oçraştı.

Uñay atmosferada uzuı belderelgän söyläşülärdä Törkiyä-Awrupa Berlege mönäsäbätläreneñ yañadan canlandırıluınıñ ähämiyätenä, ayıruça terrorçılıq belän köräştä xezmättäşlekne köçäytüneñ zarurlığına da tuqtalıp uzıldı.

Ärdoğan Tusk häm Yunker belän küreşep söyläşüennän soñ Awrupa Parlamentı başlığı Antonio Tayani belän oçraştı.

Törkiyä Däwlät başlığı ayıruça Germaniya Kanślerı Angela Merkel belän yartı säğätlek söyläşü ütkärde.