İstanbuldağı tönge klub höcümçese totqarlandı

Yaña yıl tönendä İstanbulda tönge klubta oyıştırılğan höcümdä 39 keşeneñ ülemenä säbäp bulğan Abdülgadir Maşaripov İstanbulnıñ Äsänyurt bistäsendä “DEAŞ” terror oyışmasınıñ ştab-kvartirasına oyıştırılğan operaśiya waqıtında totqarlandı.

Milli küzläw oyışması häm iminlek törkemnäreneñ operaśiyası waqıtında terrorçı belän bergä çığışı belän Ğiraqtan bulğan ber keşe häm çit il watandaşı bulğan 3 xatın-qız qulğa alındı.

Bäşiktaş Ortaköydäge höcümnän soñ terrorçınıñ totıluı öçen 17 kön buyı tığız êşçänlek alıp barğan poliśiya törle şähärlärdä operaśiya ütkärde.

Terrorçınıñ êzenä barıp citkän poliśiya bäyläneşläreneñ bilgelänelüe öçen küzätüen däwam itterde.

İstanbul iminlek mödirlegeneñ terrorçılıq belän köräş bülege törkemnäre Ortaköy höcümçeseneñ Äsänyurtta yäşerengänen bilgeläde.

Poliśiya törle adreslarda beryulı operaśiya ütkärde häm höcümçene Äsänyurt 911nçe uramda yäşerengän şähärçektä totıp aldı.

Qulğa alınuçılar sälamätlek tikşerüennän soñ Vatan uramındağı İstanbul iminlek mödirlege şähärçegenä alıp barıldı.

Qulğa alınğan 5 keşedän öçeseneñ Misır, Senegal häm Somali watandaşı xatın-qızlar buluı, terrorçılarnıñ kibetkä barğan çaqta häm urınnarın almaştırğan çaqta iğtibarnı cälep itmäw öçen bu keşelärne qullanuı bilgelände.

Şöbxälelärneñ totqarlanğan adresta ozaq waqıttan birle qaluı añlaşıldı.

“DEAŞ” terror oyışmasındağı üzbäklär belän bäyle bularaq İstanbulnıñ 5 ilçäsendä oyıştırılğan operaśiyälär waqıtında da küp sanda keşe qulğa alındı.

Höcümçe totqarlanğannan soñ Premyer-ministr urınbasarı Numan Kurtulmuş sośial’ media aşa belderü yasadı.

"Ortaköydäge küpläp üterüne yasawçını totqarlağan poliśiyäbezne täbrik itäm”, - dip äytüçe Numan Kurtulmuş: "Terror häm artındağı köçlär belän köräşebez axırına xätle däwam itäçäk”, - dip yullama yasadı.

Tışqı êşlär ministrı Mäwlüt Çavuşoğlu da: "Êçke êşlär ministrı Söläyman Soylu belän bergä iminlek häm küzläw oyışmalarına millätebez isemennän räxmätläremne belderäm”, - dip äytte.