Ärdoğan: “Törkiyäneñ dönyağa açılğan täräzäse bulaçağına ışanam”

Törkiyäneñ inglizçä tapşıruların alıp baruçı berençe xalıqara xäbär platforması “TRT World”nıñ tanıtu kiçäse İlbaşı qolliyätendä ütkärelde.

611673
Ärdoğan: “Törkiyäneñ dönyağa açılğan täräzäse bulaçağına ışanam”

Kiçädä sänğät, êş, säyäsät, sport häm media dairäsennän küp sanda çaqırılğan qatnaştı.

Çığışlar aldınnan qunaqlarğa “TRT” teleradiokompaniyasınıñ tanıtu fil’mı kürsätelde, soñınnan “TRT” Ğomum mödir urınbasarı Ärän “TRT World” kanalın täqdir itte, prezentaśiyasın yasadı.

Annan soñ “Fätullahçı” (FETÖ/PDY) terror oyışması/parallel däwlät qorılışınıñ 15nçe iyül’ kiçendä oyıştırılğan tüntäreleş kereşüe waqıtındağı “TRT World” tapşıruları turında qısqa fil’m täqdim itelde.

Kiçädä çığış yasawçı İlbaşı Ärdoğan: “"TRT”gä häm "TRT World” ğailäsenä ozın sulışlı häm uñışlı êfir êşçänlege telim”, - dip süzlärenä başladı.

“TRT World”nıñ üz ölkäsendä bik möhim buşlıqnı tutıraçağına ışanuın assızıqlawçı Ärdoğan:

"Min şuşındıy berekmägä häm köçkä iyä bulğan “TRT World”nıñ şiğarendä äytelgäne kebek çınnan da Törkiyäneñ dönyağa açılğan täräzäse bulaçağına ışanam. “TRT World”nıñ yaña ber tel belän xikäyäne yañadan añlatu, mikrofonnı süz birmäwçelärgä suzu, kameranı kürenmägännärgä yünältü maqsatın da bik qimmätle dip tabam. Xalıqara media zur külämdä ber-bersenä oxşağan, alıp baruçılar häm kanallar üzgä bulsa da xäbärne täqdim itü stile häm tele bertörle bulğan çorda mondıy missiya belän yulğa çığu maqtawğa layıq”, - dip äytte.

“FETÖ”nıñ tüntäreleş kereşüe uñışlı bulğan oçraqta qayber xalıqara media organnarınıñ tüntäreleşne legalläşterergä tırışaçağına iğtibarnı yünältüçe Ärdoğan “DEAŞ”qa qarşı iñ zur köräş alıp baruçı, yözlärçä watandaşın oyışmanıñ qanlı ğamällärendä yuğaltqan Törkiyäneñ şulay uq şuşı media organnarınıñ qara propagandasınıñ maqsatına äylänüenä basım yasadı.

“TRT World”qa bik möhim wazıyfalar turı kilüen belderüçe Ärdoğan: "Bu saylap alınğan kanalıbızdan ilebezneñ, millätebezneñ çınbarlığın, iñ yaxşı xäbärçelekne, iñ yaxşı televideniyä êşçänlegen başqarıp, dönyağa añlatuın kötäbez. Bu kanalıbıznı zalimnärneñ propaganda byulletene tügel, cäberlängännärneñ gör tawışı bularaq kürergä telibez”, - dip äytte.

Premyer-ministr urınbasarı Numan Kurtulmuş ta “TRT”neñ 13 televideniye, 16 radio kanalı, 5 jurnal, 41 tel häm şiwädä alıp barğan web häm radio tapşıruları belän, 13 ildäge wäkilçelekläre belän Törkiyädä däwlät mediasınıñ balqıp toruçı yoldızı bulırğa däwam itüen belderde.

“TRT” Ğomum mödire Şänol Göka da teleradiokompaniyasınıñ tapşırular strategiyasına tuqtalıp uzdı häm “TRT”neñ monnan soñğı çorlarda tapşırular strategiyasınıñ “TRT World”ta bulğanı kebek tağın da kübräk çit illärgä yünälgän häm êçtälege bularaq çit il östenlekle buluın planlaştıruların äytte.

Göka Törkiyäne häm törek keşesen barı tik inglizçä genä tügel, başqa tellärdä dä böten dönyağa añlatırğa teläwlären assızıqladı.

“TRT World” belän bäyle prezentaśiya täqdir itüçe “TRT” Ğomum mödir urınbasarı İbrahim Ärän dä kanalnıñ tapşıru nigezlären, media êşçänlege prinśipların añlattı.

Ärän keşe üzäkle qaraş totışı, xäbärçelektäge qıyu perspektiva häm mäs’älälärgä tirän qaraşnıñ nigezläre buluın äytte.



Bäyläneşle xäbärlär