Üzbäkstanda yaña xökümät

Üzbäkstan ilbaşı Şäwkät Mirziyayev Abdulla Aripov citäkçelegendä qorılğan yaña xökümätne rasladı. İlbaşı apparatınnan belderülärençä, ul monıñ belän bäyle qararnı imzalağan.

Abdulla Aripov qabat citäklägän xökümättä 4 urınbasar häm 20 ministr bar.

Üzbäkstanda 27nçe oktyabr’dä ğomum saylawlar uzdı. Şunnan soñ bu atna başında yaña xökümät oyıştırılu maqsatınnan êlekkegese tarqatıldı.

Qanun çığaru mäcleseneñ kiçäge utırışında ilbaşı Mirziyayev, säyäsi partiyälär belän söyläşkännän soñ, Aripovnı qabat xökümät räise wazıyfasına täq’dim itte. Deputatlar yäşeren tawış birü yulı belän älege kandidatnı rasladı.

Aripov 2016nçı häm 2019nçı yıllardağı saylawlardan soñ xökümät räise bulğan ide.