Törkiyä belän Azärbaycan arasında tabiğıy gaz kileşüe imzalandı

Törekmänstannıñ tabiğıy gazın Azärbaycan häm Gruziya aşa Törkiyägä kiterü turında kileşü tözelde.

Törkiyä ênergetika häm tabiğıy çığanaqlar ministrı Alparslan Bayraktar Azärbaycan iq’tisad ministrı Mikail Cabbarov belän İstanbulda oyıştırılğan “Törkiyä - Azärbaycan tabiğıy gaz tarmağında xezmättäşlek kileşüen imzalaw” tantanasında qatnaştı. Annan soñ bulğan matbuğat oçraşuında Bayraktar çığış yasadı häm ike ilneñ bügengä qadär şaqtıy proyektnı bergäläp başqaruın assızıqladı.

“Baqı-Tbilisi -Cäyxan neft’ çimalı ütkärgeçe Xäzär töbäge, Kavkaz regionındağı qara altınnı Törkiyägä häm Törkiyä aşa dön’ya bazarına çığaruda ähämiyätkä iyä. Bu dön’yada neft’ täêminatın balanslaw öçen dä bik möhim”,- dip söyläde ministr Alparslan Bayraktar.  Ul ike ilneñ Baqı-Tbilisi-Ärzurum tabiğıy gazütkärgeçe, Trans Anadolu tabiğıy gazütkärgeçe proyektların başqaruın xäterlätte.

“Bigräk tä bügen imzalanğan kileşü belän mönäsäbätlärebez tabiğıy gaz mäydanında yaña däräcägä kütärelä. Bu kileşüdä 2030nçı yılğa qadär Azärbaycan çığanaqlarınıñ, tabiğıy gazınıñ, Xäzär çığanaqlarındağı zäñgär yağulıqnıñ Törkiyägä kilüe häm ber öleşeneñ Törkiyä aşa Awrupağa qudırıluı küzallana”,-dip söyläde ministr.       

Azärbaycan iq’tisad ministrı Cabbarov ta Törkiyä-Azärbaycan xezmättäşlegeneñ Awrupanıñ ênergetika iminlegenä öleş kertüenä iğ’tibarnı cälep itte. Ul Iğdır-Naxçivan ütkärgeçeneñ dä ähämiyäte turında söyläde. Cabbarov äytüençä, älege töbäkkä cibäreläçäk tabiğıy gaz belän Naxçivannıñ ênergetika qurqınıçsızlığı tışında, Törkiyä-Azärbaycan tuğandaşlığı da nığıyaçaq.