Qırğızstan belän Qıtay arasında kileşülär tözelde

İlbaşı idaräseneñ matbuğat üzägennän yasalğan belderüdä, Caparovnıñ 17nçe-20nçe may könnärendä Qıtayğa berençe räsmi säyäxät yasawı xäterlätelep, säfär näticäsendä qıymmäte 1 milliard dollardan kübräk kileşülärneñ imzalanuı citkerelde.

Belderüdä Caparovnıñ Qıtay vizitı qısalarında ênergetika, awıl xucalığı häm kinematografiya ölkäsendä qul quyılğan kileşülär häm proyıkt turında da mäğ’lümat birelde.

Qırğızstan ênergetika ministrlığı belän “China Power International Development Limited” şirkäte arasında imzalanğan investiśiya kileşüenä kürä, Qırğızstannıñ Êsse-Kül töbägendä 800 million dollarlıq häm ber meñ megawatlıq qoyaş ênergiyası stanśiyası salınaçaq.

Qırğızstan awıl xucalığı belän “Hebei LLC Bai Dou Jia” şirkäte arasındağı kileşügä kürä isä, Qırğızstanda 260 million dollarlıq aşlama citeşterü kombinatın tözü proyıktı tormışqa aşırılaçaq.

Qırğızstan mädäniyät, informaśiya, sport häm yäş’lär säyäsäte ministrlığı belän “Shaanxi Tianhan Shengdian Film Company Ltd.” şirkäte arasında 38 million dollar bäyäsendä "Yefäk yulınıñ yıraq cilläre” isemle urtaq serialnı töşerü proyıktı başlanaçaq.

“Beijing Zhongyi Boyue Culture Media Co.” şirkäte belän dä 25 million dollar qıymmätendä "Bişkäk mäxäbbäte” isemle urtaq serial töşereläçäk.