Äminä Ärdoğan Gafarova belän küreşte

Türkiyä İlbaşı Räcäp Tayyip Ärdoğannıñ xäläl cefete Äminä Ärdoğan Berläşkän Millätlär Oyışmasındağı 30nçı mart Xalıqara qaldıqsız tormış köne maxsus utırışında qatnaşu öçen kitkän Amerika Quşma Ştatlarınıñ N’yu-York qalasında Azärbaycan Milli Mäcles Başlığı Sahibä Gafarova belän oçraştı.

Ärdoğannıñ Gafarova belän “Törek yortı”ndağı oçraşuında Tışqı êşlär ministrı Mäwlüt Çavuşoğlu da qatnaştı.

Oçraşu belän bäyle bularaq “Twitter” akkauntınnan yazma belän urtaqlaşqan Ärdoğan: "Qaldıqsız tormışqa qağılışlı täcribälärebez belän urtaqlaştıq. Êkologiya problemalarınıñ böten dönya illäreneñ cawaplılığında buluı mäs’äläsendä häm klimat krizisı belän urtaq köräş ölkäsendä bez urtaq fikerdä,” – dip belderde.

BMO Ğomum şurası 2022nçe yılnıñ 14nçe dekabr’ könne Türkiyä töp äydäp baruçısı, 105 il isä urtaq alıp baruçısı bulğan “qaldıqsız tormış” qararın qabul itkän ide.

Ğomum şuranıñ şuşı qararı belän 30nçı mart “Xalıqara qaldıqsız tormış köne” itep iğ’lan itelde.