"Kimendä 100 yılğa citärlek tabiğıy gaz rezervı bar"

Azärbaycan ilbaşı İlham Äliyev 2027nçe yılğa qadär Awrupağa gaz êksportın 2 tapqır arttırırğa planlaştıruların belderep: “Bezgä häm xezmättäşlärebezgä kimendä 100 yılğa citärlek tabiğıy gaz rezervı bar,”-dide.

Baqıda “Kön’yaq gaz koridorı 9nçı konsul’tativ şurası” cıyılışı uzdı.  

Äliyev anda yasağan çığışında 2027nçe yılğa qadär Awrupağa gaz êksportın 2 tapqır arttıru öçen çığanaqları citärlek buluın citkerde häm ber-berenä ışana torğan awrupalı xezmättäşläre belän urtaq xäräkät itülären assızıqladı.

Äliyev Azärbaycannıñ zäñgär yağulıq êksportı turında bolay dip söyli: “Tabiğıy gaz êksportıbız arta. 2021nçe yılda yaqınça 19 milliard kubometr, uzğan yıl 22,6 milliard kubometr tabiğıy gaz êksportladıq. 2023nçe yılda anıñ 24,5 milliard kubometrğa citäçägen küzallıybız”.

Azärbaycan liderı monnan alda tormışqa aşırğan Baqı-Tbilisi-Cäyxan neft’ütkärgeçe, Baqı-Tbilisi-Ärzurum gazütkärgeçe häm Kön’yaq gaz koridorı şikelle barlıq proyektlarnıñ uñışlı buluın xäterlätä.  

“Awrupağa tabiğıy gaz da, yañartıla aluçı ênergiyä cibärügä yünälgän kiläçäk plannarıbıznıñ da uñışlı bulacağınnan şöbhälänmim. Monıñ öçen törkem êşçänleklärebezne däwam itüebez häm ber-berebezgä härwaqıt teräk buluıbız kiräk,”-dip söyläde İlham Äliyev.