Mesxet törekläre Xersonnan Türkiyägä kilde

Rusiyä belän suğış baruçı Ukrainanıñ Xerson şähärendä yäşägän 88 mesxet törege Sarp çik qapqasınnan Türkiyägä kerde.  

Diplomatik çığanaqlardan alınğan mäğ’lümatlarğa qarağanda, möhacirlärneñ 84e Türkiyä tışqı êşlär ministrlığı häm Türkiyäneñ Mäskäwdäge ilçelege tırışlığı belän Xersonnan başta Rusiyägä çığarılğan, annan Gruziyägä kiterelgän. Yulçılıq waqıtında alarğa êlegräk Rusiyägä kitkän tağın 4 mesxet törege quşıla. Şulay itep möhacirlärneñ sanı 88gä citä. Alarnı ilneñ Êlaziğ töbägendä urnaştıru küzdä totıla.

Türkiyägä kilgän törkemdägelärneñ kübese ölkännär häm balalar. Alar Xersonnan 31nçe oktyabr’dä yulğa çıqqan.