"Bez bäysezlegebezne tağın da kisken yaqlarğa äzer"

Qazaqstan ilbaşı Qasıym-Cumart Toqayev bäysezleklären häm milli mänfäğat’lären barı diplomatik yul belän tügel, tağın da qatğıy poziśiyälärdä yaqlarğa äzer buluların äytte. Wäqalätle zat Xäzär diñgeze yarında urnaşqan  Mangistaw töbägeneñ administrativ üzäge Aqtaw şähärenä êşlekle säfär yasadı.

Cirlektäge xalıq belän oçraşuda ilbaşı axırğı tapqır Aqtawda 2018nçe yılda uzğan sammitta Xazar diñgezeneñ xoquqıy statusınıñ açıqlanuın häm däwlät çikläre belän bäyle problemanıñ betüen söyläde.Toqayev xäzerge waqıtta Qazaqstannıñ barlıq çikläreneñ qanuni bularaq bilgelänüen citkerde. “Êlekkege Sovetlar däwlätläreneñ kübesendä äle haman da bu mäs’älädä törle añlaşılmawçanlıqlar bar. İñ yaqın kürşelärebezneñ dä çiklärendä suğış häm qorallı bäreleşlär bara,”-dide Toqayev.

Qazaq lider saylaw prośessına kergän ilendä soñğı aylarda däwlätneñ mäğ’lümati sistemalarına höcümnär yış buluın iskärtte.

“Yalğan mäğ’lümat taratuçılarğa yul quymayaçaqbız. Monı êlegräk tä äyttem. Bez izge dip sanaluçı bäysezlegebez häm milli mänfäğat’lärebezne barı diplomatiyä yulı belän tügel, tağın da kisken poziśiyälärdä yaqlarğa äzer,”-dide ul.

Toqayev däwlätneñ totrıqlılığı häm iminlegenä tışqı säyäsät qadär ük, êçke wäzğıyät’neñ dä zur yoğıntı yasawın assızıqlıy. “İlebezdä häm çik ar’yağında fetnä häm doşmanlıq orlığı çäçüçelär bulğanda, ğam’sez bulırğa yaramıy,”-di Qazaqstan ilbaşı.