Nur-Soltan qabat Astana bulaçaq

Qazaqstan parlamentı başqala Nur-Soltannıñ atamasın qabat Astanağa üzgärtü öçen qanun proyektı äzerläde. Ul Konstituśiyägä üzgäreşlär kertüne küzallıy.

Qanun ölgese Parlamentnıñ asqı palatası - Mäcles häm öske palatası Senatnıñ berdäm utırışında qabul itelde. İlbaşı Qasıym Cömärt Tokayev imzalağannan soñ ul ğamälgä keräçäk.

Monnan alda Qazaqstan mäclesendäge ber törkem deputatlar, xalıqnıñ yaña atamanı qabul itmäwen belderep, şähärgä êlekkege Astana isemen kire qaytarunı täq’dim itte.

Qazaqstan ilbaşı Qasıym Cömärt Tokayev 12nçe sentyabr’dä Konstituśiyä şurasına möräcäğat’ itep deputatlarnıñ älege täq’dimeneñ qanunğa turı kilüen tikşerde häm uñay cawap aldı.

Qazaqstannıñ berençe ilbaşı Nursoltan Nazarbayıv 2019nçı yılnıñ 19nçı martında xakimiyättän kitte. Şunnan soñ ber kön ütügä Qasıym Cömärt Tokayev parlamentta başqala Astananıñ atamasın Nur-Soltan itep üzgärtergä täq’dim itte.

İlneñ törle poçmaqlarında uzğan demonstraśiyä häm imza kampaniyälärenä qaramastan, älege täq’dimne 2019nçı yılnıñ 23nçe martında deputatlar bertawıştan qabul itte.