"Tatarnıñ berdänber milli ictimağıy oyışmasına noqta quyıldı"

Bötentatar ictimağıy üzägen êkstremizmda ğayepläp yabalar

1841572
"Tatarnıñ berdänber milli ictimağıy oyışmasına noqta quyıldı"
TİÜ.jpeg

Tatarstan yuğarı mäxkämäse Bötentatar ictimağıy üzägen êkstremist oyışma dip taptı. Qarar nigezendä, anıñ êşe tuqtatılaçaq.

Azatlıq radiosı säxifäsendä yazılğança, 10nçı iyün’dä Tatarstan yuğarı mäxkämäsendä Bötentatar ictimağıy üzägeneñ êşe buyınça axırğı utırış uzdı. Prośess yıl yarım däwam itte. Oyışmanı urıslarğa qarşı näfrät uyatuda häm Tatarstannıñ Rusiyädän ayırılıp çığu ideyasın propagandalawda ğayeplilär.  

Tatarstan prokuraturası 2021nçe yılnıñ ğıynvarında ictimağıy üzäkne êkstremist oyışma dip tanu häm êşçänlegen tıyunı sorap Yuğarı mäxkämägä möräcäğat’ itkän ide.

Tatarstan Yuğarı mäxkämäsendä uzğan utırışta Tatar ictimağıy üzäge räise urınbasarı Galişan Nuriäxmät, yaqlawçı Aleksey Zlatkin qatnaştı. Alar yaña êkspertiza yasaluın, näticälären kötülären häm şuña utırışnı küçerüne sorap möräcäğat’ itte. Tik mäxkämä rizalaşmadı.

Qararğa tatar qaläm iyäläre häm cämäğat’ êşlekleläre qatğıy rizasızlıq belderde. Tanılğan jurnalist Rämis Latıypov üzeneñ sośial’ akkauntında bolay dip yaza: “Tatarstan barlıqqa kilgän çaqlarda xalıq kütäreleşendä iñ zur säyäsi köçkä iyä bulğan oyışma şul räweşçä yabıla. Xäzer anıñ turında yazğanda häm telgä alğanda “êkstremistik dip tıyılğan” iskärtüe mäcbüri bulıp çığa. Xäzerge Bötentatar ictimağıy üzäge êlekkege kebek köçkä iyä bulmasa da, ul yıl sayın Xäter könen oyıştıra, säyäsi waqıyğalar uñayınnan belderülär yasıy, çaralar uzdıra ide. Ul şulay tıyıla ikän, dimäk, aña säyäsi köç itep qarağannar”.

Jurnalist Êl’vira Fatıyxova da sośial’ mediada älege waqıyğağa qarata fikeren citkerde. “1989nçı yıldan birle êşlägän Tatar milli xäräkäten töbe-tamırı belän yolqıp aldılar. Yuğarı mäxkämä Tatar ictimağıy üzägen êkstremistik oyışma dip taptı. Tatarnıñ berdänber milli ictimağıy oyışmasına noqta quyıldı”-dip yazdı ul.

Bötentatar ictimağıy üzäge yaqlawçısı Aleksey Zlatkin qararnı Tübän Novgorodtağı 4nçe appelyaśiyä mäxkämäsenä şiqayät’ itäçägen belderde.

Fotolar Azatlıq radiosı säxifäsennän alındı



Bäyläneşle xäbärlär