Söyembikä häykäle Qazannı sağına...

Qasıym şähärendä Qazan xanbikäsenä häykäl açıldı

1841512
Söyembikä häykäle Qazannı sağına...

Kiçä Rusiyäneñ Ryazan’ ölkäse Qasıym şähärendä Qazan xanlığınıñ danlıqlı xanbikäse - Söyembikäneñ häykälen açu tantanası uzdı.

Älege çara İdel buyı Bolğar däwlätendä islam dinen qabul itüneñ 1100 yıllığı, Qasıym şähäreneñ 870 yıllığı häm Qasıym xanlığınıñ 570 yıllığına bağışlana.

Bilgele bulğança, Söyembikä 1553nçe yılda, Qazan xanlığı cimerelgänjnän soñ, Qasıym xanı Şahgaligä kiyäwgä birelä häm soñğı yılların biredä uzdıra.

3 metr biyeklektäge häm 1,5 tonna awırlıqtağı häykälne Sankt-Peterburgta bronzadan qoyalar. Ul Qasıym şähäreneñ tarixi urınında, Oka yılğası buyındağı Xan törbäse belän Xan mäçete yanında tora. Şuşında uq berniçä yıl êlek Söyembikä isemendäge skver açıldı. Sın anıñ urtasına quyıla.

Xanbikä ber qulın yöräk turısına quyğan, başın yuğarı kütärgän. Bu obrazda, avtorlar äytkänçä, Qazannı sağınu häm xalqına mäxäbbät tä, köçle häm nıqlı rux ta çağıla.

Häykälne sınçılar Viniamin Sidorenko häm Andrey Gubko icat itte.

Fotolar Tatar-inform häm Azatlıq säxifälärennän alındı.



Bäyläneşle xäbärlär