Azärbaycan azat itelgän töbäklärdä awıl xucalığına ähämiyät birä

Azärbaycan İlbaşı İlham Aliyıv Törkiyä İlbaşı Räcäp Tayyip Ärdoğan belän bergä nigezen salğan, törek häm azärbaycan investorlarınıñ urtaq proyıktı bulğan Zängilandağı “Dus agropark” aqıllı awıl xucalığı şähärçegeneñ yawdan azat itelgän başqa töbäklärdä tözeläçäk awıl xucalığı parkları öçen ürnäk bulaçağın äytte.

Aliyıv 2nçe Qarabax suğışında okkupaśiyädän azat itelgän Zängilan vilayätenä maxsus wäkil bulıp bilgelägän Vahit Xacıyıv belän video konferenśiya aşa söyläşü ütkärde.

Ärmännärneñ Zängilanda zur cimerülär yasawın, tar-mar itelmägän ber genä toraq punktnıñ da qaldırmawın xäterlätüçe Aliyıv yawdan azat itelgän başqa töbäklär kebek Zängilannı da yañadan töziyäçäklären iskärtep uzdı.

Aliyıv Zängilannıñ immigrantlar yaqın waqıtta kire qaytaçaq vilayät buluın, biredäge Ağalı awılınıñ yañadan tözelüen belderde.

Zängilanda tormışqa aşırılğan asqorma proyıktların telgä aluçı Aliyıv yawdan azat itelgän töbäklärdä awıl xucalığı belän bäyle zur plannarınıñ buluına basım yasadı.

Aliyıv: "Azat itelgän töbäklärdäge berençe awıl xucalığı parkı da Zängilanda tözelä. Uzğan yıl qardäşem, Törkiyä Cömhüriyäte Däwlät başlığı Räcäp Tayyip Ärdoğan belän bergä “Dus agropark” isemle awıl xucalığı parkınıñ nigezen saldıq. Bu parknıñ êşçänlege xaqında qısqa waqıt êlek üzemä mäğ’lümat birelde. Böten närsä planğa qarap barğanı öçen min bik şat. Bu berençe häm ürnäk awıl xucalığı parkı bulaçaq. Zängilanda êş mäşgul’legeneñ häm iq’tisadnıñ töp tarmağınıñ berseneñ awıl xucalığı bulırğa tiyış, dip uylıym. “Dus Agropark” misalında azat itelgän böten töbäklärdä buldırılaçaq manzaranı kürergä tiyışbez”, - dip äytte.

Ärmännärneñ okkupaśiya waqıtında Zängilandağı häm başqa vilayätlärdäge altın şaxtaların êşlätüen, biredän alınğan altınnarnıñ çit illärgä satıluın citkerüçe Aliyıv: "Altın yatmalarınıñ çit il keşeläre, ayıruça çığışı belän ärmän bulğan çit il watandaşları tarafınnan qanunsız räweştä êşlätelüe alarğa bik qıymmätkä töşäçäk. Alarnıñ isemnären beläbez. Bez alarnı böten dönya aldında açıp salaçaqbız häm bezgä kompensaśiya tüläyäçäklär. Alar birgän zararnı motlaq räweştä qaplayaçaqlar”, - dip belderde.