Londondağı uyğır restoranı: millätne tanıtu öçen...

Restorannıñ xucası Möqaddäs xanım Londonğa küçenüe, awırlıqlar häm yaratqan êşen başlawı turında söyli

1616048
Londondağı uyğır restoranı: millätne tanıtu öçen...
UYGUR LEZZETLERİ.jpg

London-kosmopolit, törle keşelär yäşi torğan şähär, här uramnan ber millät çığa. Bez uyğır aş-suların Londonğa häm dön'yağa tanıtırğa tırışabız. Min  - Möqaddäs Yädegär, irem belän bergä Londondağı uyğır restoranın - "Etles Uygur"nı açtıq häm anı êşlätüne däwam itäbez.

Qıtaynıñ Uyğır avtonom töbägendä Gul'ja şähärendä tudım. 2003nçe yılda universitetnı tögällädem, 2004tä aspiranturada uqu öçen Törkiyägä kildem. İstanbul universitetınıñ Törek tele häm ädäbiyatı bülegenä kerdem häm bulaçaq irem belän tanışqaç, 2010nçı yılda Angliyägä kildem. Monda uyğır restoranı bulmawına iğ'tibar ittem. Duslar belän oçraşqanda baraçaq urın taba almıy idek. Hind, qıtay restorannarına, xäläl bulmağanğa, bolay da kermibez. Uyğır restoranı bulsa ide dip uyladım...

Restoran açu niyätemä ğailäm, äniyem başta qarşı kilde. Çönki bik awır êş ikänen belälär ide. “Awırsınırsıñ, balalar keçkenä, êşli almassıñ” didelär.

Berençe yılıbız bik awır buldı. Monda berkemne dä belmibez. Öç balamnı da êşkä alıp kilergä mäcbür idem. Ber qırıyğa utırtam. Şunda utıralar ide. Kilüçelär alarnı totıp söyde.

Kerüçe başta rizıqlarıbıznı aşıy, anı nıq oşatqaç, kem buluıbıznı sorıy. “Qaydan kildegez, bu qaysı yaq rizıqları”, -dilär. Min utırıp alarğa uyğırlar turında söylim. Bu bezneñ balaçaqtan birle tanış rizıqlar, ğailädä bez aşap üskän aş-sular. Şuña bu rizıqlar miña balaçağımnı xäterlätä, lagman da, mantıy da, uyğır pılawı da... Lagman uyğırlarnıñ iñ ğadäti azığı. Tuğan cirdä här kön diyärlek aşağan rizıqlarıbızdan berse. Peşerü küp waqıtnı ala. Qamırnı irtän ük basabız, annarı 1-2 säğat' kötep torırğa kiräk. Annan qabat basabız. Soñınnan qamırnı beräm-beräm kisep qulıbız belän cäyäbez. Yuqa bulırğa tiyeş. Qamır nıq bula. Soñınnan anı suda peşeräbez. Sousın ayırım qazanda qızdırabız. İt, borıç, qızıl borıç, bezneñ törle yäşelçälärebez - alarnı quşıp sousnı bolğatabız. Qamırnıñ quldan äzerlänüe kliyentlarğa oşıy. Anıñ yaña buluın aşağan keşe xis itä. Keşelär bezneñ rizıqlarda ayırım täm taba. İnglizlär, berençe kilep aşağaç, qıtay häm törek rizığınıñ quşılması di ide. Bik üzençälekle, bu rizıqnı başqa ber urında da kürmädek, qıtaynıqına oxşamağan diyüçelär dä buldı.

Angliyädä uyğırlar bik az. Londonda da küp tügel, bulğannarı belän oçraşabız. Mäsälän, Näwruz bäyrämendä, yäisä Qorban häm Ramazan bäyrämnärendä.

20 yıl êlek ätiyem wafat buldı. Zur abıyım Qıtayda qaldı, tuğannarnıñ barısı anda. İkençe abıyım Niderlandta yäşi, min monda. Bez 4 qardäş - 4 ildä. Ber qardäşem uzğan yıl İstanbulda wafat buldı. Xäzer 3 qardäş qaldıq. Qıtaydağı abıyım belän oçraşa almıybız. 5 yıl buldı küreşmägängä. Andağı tuğannarnıñ berse belän dä küreşä almıybız, alarğa şaltıratıp ta bulmıy. Ni xäldä buluların belmibez...

Bez, älbättä, bu restorannı açqanda awırlıqlar çiktek, ämma min bu êşne oşatam, yaratıp êşlim. Çönki uyğır restoranı açıp min uyğırlarnı tanıtuımnı uylıym. Şuña kürä êşemne yaratam, ğorurlanam. Uyğır restorannarınıñ tağın da kübräk açılıp, xalqıbıznı dön'yağa tağın da kübräk tanıtuın telim.



Bäyläneşle xäbärlär