Qazaqstanda xökümät tarqaldı

Qazaqstanda 10nçı ğıynvarda uzğan parlament saylawlarınnan soñ başministr Askar Mamin citäkçelegendäge xökümät tarqatıldı.

İlbaşı matbuğat xezmätennän belderülärençä, däwlät başlığı Qasıym Cömärt Tokayev, Konstituśiyä quşqança, ildä yaña kabinet oyıştırılğanğa qadär xäzerge xökümät äğ’zalarınıñ wazıyfaların cirenä citkerüne däwam itüläre belän bäyle qararnı imzaladı.

Şuña kürä, ilneñ başministrı Askar Mamin citäkçelegendäge xökümät wazıyfasınnan kitsä dä, yaña kabinet bilgelängängä qadär urınnarında qala birä.

Qazaqstanda 10nçı ğıynvarda uzğan parlament saylawlarında xakimiyättäge Nur Otan partiyäse 71,9% tawış cıyıp ciñüçe buldı. Anıñ tışında, Aq Yul demokratik partiyäse häm Qazaqstan xalıq partiyäse dä 7%lı çikne uzuğa ireşte. Alar da parlamentta urın alaçaq.