Ärmännär öylärgä ut törtep kitä

10nçı noyabr'dä tözelgän kileşü nigezendä Tawlı Qarabaxtan kitüçe ärmännär öylärne häm urmannarnı yandıra

1527470
Ärmännär öylärgä ut törtep kitä

Azärbaycannıñ 27 yıl buyı ärmännär okkupaśiyäsendä bulğan Kälbäcär şähäre 10nçı noyabr’dä tözelgän solıx kileşüe nigezendä buşatıla. Tik cirlektän kiteşli ärmännär öylärgä häm urmannarğa ut törtä.

Rusiyä matbuğatında häm sośial’ mediada çıqqan videolardan kürengänçä, Kälbäcärneñ törle töbäklärendä yäşäwçe ärmännär kitär aldınnan öylärne yandıra häm cimerä.  

Azärbaycannar 27 yıl êlek bernilären diyärlek almıyça Kälbäcärdän kitärgä mäcbür buldı. Ärmännär şul waqıttan birle toruçı yortlarnıñ işek, täräzä häm xätta yuınu bülmäse aksesuarlarına qadär sütep ala. Monıñ belän genä betmi – ut törtälär.

Kälbäcär Azärbaycannıñ könbatışında, Ärmänstan çigendä urnaşqan. Anı 1993nçe yılda basıp alalar. Ul waqıtta Kälbäcär şähär üzäge häm 128 awılda yäşäwçe yaqınça 60 meñ azärbaycanlı öylären taşlap kitärgä mäcbür bula. Ärmänstan basıp alğanğa qadär anda ärmännär yäşämägän. Soñınnan biregä törle töbäklärdän ärmännärne kiterep urnaştıralar. Qanunsız räweştä yortlarğa kerep utıralar.

Rusiyäneñ aradaşçılığı belän Azärbaycan häm Ärmänstan 10nçı noyabr’dä kileşü tözede. Anıñ nigezendä, 15nçe noyabr’dä Ärmänstan armiyäseneñ Kälbäcärdän kitüe kötelä.



Bäyläneşle xäbärlär