"Törkilärneñ köçen böten dön'yağa kürsättegez"

İlham Aliyev räsmi säfär belän Baqığa kilgän Törkiyä tışqı êşlär ministrı Mäwlet Çavuşoğlun qabul itte

1519617
"Törkilärneñ köçen böten dön'yağa kürsättegez"

Azärbaycan ilbaşı İlham Aliyev Tawlı Qarabaxta suğışnıñ däwam itüe häm ike yaqtağı yuğaltular öçen Ärmänstan xökümäte başlığı Nikol’ Paşinyannıñ cawaplı buluın äytte.

Aliyev räsmi säfär belän Baqığa kilgän Törkiyä tışqı êşlär ministrı Mäwlet Çavuşoğlun qabul itte. Söyläşü barışında Azärbaycan armiyäseneñ cirlären qotqaru öçen başlağan operaśiyäse, Ärmänstan xökümäte räise Nikol’ Paşinyannıñ Rusiyä däwlät başlığı Vladimir Putinğa xat yazıp yärdäm corawı turında da süz buldı.

Aliyev äytüençä, Paşinyannıñ xatı ottıruların qabul itüläre, ämma tulısınça birelergä telämäwlären kürsätä. “Ärmänstannıñ ciñelüen iğ’lan itep, armiyäsen bezneñ territoriyädän çığaruı häm mäs’äläneñ östäl artında çişelüe – iñ aqıllı variant. Azärbaycan berüze BMO iminlek şurasınıñ qararların tormışqa aşıra häm kübesen aşırdı. Başqa öleşläreneñ dä tormışqa aşaçağına häm ilebezneñ territorial’ bötenlege täêmin iteläçägenä ömetlänäm,”-di Aliyev.

Ul teläktäşlek öçen törek xalqına räxmäten citkerde. Aliyev Törkiyä jurnalistlarınıñ könne-töngä yalğap häm ğomerlären qurqınıç astına quyıp cirlektä êşlären başqaruın, dön’yağa Tawlı Qarabaxtağı waqıyğalarnı citkerep baruın äytte.  İlbaşı äytüençä, Gäncä häm Bärdä bombalanğannan soñ, waqıyğa urınına berençe bulıp törek jurnalistları barıp citkän. Monı ul Törkiyä-Azärbaycan duslığınıñ kürsätkeçe dip belderä.

Törkiyä tışqı êşlär ministrı Mäwlet Çavuşoğlu isä üz çığışında Azärbaycannıñ yaw qırındağı uñışları öçen ğorurlıq xis itülären belderde. “Böten dön’yağa törkilärneñ köçen kürsättegez,”-dide ul.

Çavuşoğlu Tawlı Qarabaxtağı waqıyğalarnı Törkiyäneñ yaqınnan küzätep baruına iğ’tibarnı cälep itte.  “Xalqıbız bezne daimi räweştä Azärbaycanğa tağın da kübräk yärdäm kürsätergä çaqıra,”-di ministr.

Çavuşoğlu Azärbaycannıñ frontta da, xoquqıy yaqtan da östen buluına qaramastan, utnı tuqtatu iğ’lan itü häm östäl artında söyläşü mäs’äläsendä üz-üzenä ışanuçı däwlät häm millät buluın bar dön’yağa kürsätüen assızıqladı.

“Monı añlawçı bar, añlamawçı bar, añlarğa telämäwçe bar. Ärmänstannıñ närsä êşläwen häm utnı tuqtatu kileşüen härwaqıt bozuın barısı da kürä, ämma monı äytergä telämilär. Şul säbäple üz arabızda teläktäşlekne tağın da köçäytep, xoquqlarıbıznı yaqlawnı däwam itäçäkbez,”-dide Çavuşoğlu.



Bäyläneşle xäbärlär