Ärmänstan utnı tuqtatu kileşüen sanğa suqmıy

Alar Azärbaycannıñ şähär häm awıllarına raketalar cibärde

1506908
Ärmänstan utnı tuqtatu kileşüen sanğa suqmıy

Ärmänstan, Azärbaycan belän ike arada tözelgän utnı tuqtatu kileşüen bozıp, uzğan töndä qabat tınıç xalıqqa höcüm itte. Toraq punktlarğa töşkän raketalar astında ülüçelärneñ sanı 11gä citte. Alarnıñ 2se bala, 4se xatın-qız. 35 keşe isä yaralı.

Ärmänstan armiyäse xärbi operaśiyälärdän yıraqtağı şähär häm awıllarğa ut açuın däwam itä.

Äzärbaycan saqlanu ministrlığınnan belderülärençä, ärmännär Gäncä häm Mingäçevir qalalarına, Goranbay, Tärtär, Ağdam, Ağçabedi, Fuzuli häm Cäbrail rayonnarınıñ awıllarına artilleriya häm raketalar belän ut açqan. Regiondağı xälneñ kiyerenkeläşüe tulısınça Ärmänstan idaräse cawaplılığında.

Azärbaycan prokuraturasınnan yasalğan belderüdä ilneñ ikençe zur şähäre Gäncägä tönge säğat’lärdä cibärelgän raketalar toraq yortlarğa töşkän. Cimerelgän binalar astınnan êzläw häm qotqaru êşläre däwam itä.

Azärbaycan armiyäseneñ ärmännärgä cawabı kiçekmästän yasaldı. 38 ärmän ğaskäriye üterelde, küp sanda suğış qoralları häm texnikası yuq itelde. Alar kire çigenergä mäcbür buldı. Täêsirsez xälgä kiterelgännär arasında Xocalıdağı üterülärne başqarğan häm Asala terrorçı oyışması äğ’zası Aleksandr Arutyunyan da bar.

Azärbaycan hawa köçläre Mingäçävir şähäre östendä oçuçı Ärmänstan dronın bärep töşerde.

Azärbaycan ilbaşı urınbasarı Xikmät Xaciyev höcüm yasarğa mataşuçı Ärmänstan armiyäseneñ Cäbrail häm Xadrutta awır yuğaltular kiçerep kire çigenüen söyläde. Ul, monnan tış, Ärmänstanğa gumanitar yärdäm iseme astında awır qorallar taşuların da citkerde.

Xaciyev Twitter säxifäsendä yasağan belderüendä Ärmänstannıñ toraq punktlarğa höcüm itep keşelek cinayäte başqaruın assızıqladı. Ul älege ildä däwlät däräcäsendä terrorçılıq säyäsäte alıp barıluın, Yerivan idaräseneñ cäzasız qaluınıñ anıñ tağın da kübräk xärbi cinayät’ êşlärgä êtäräçägen belderde. “Ärmänstannı tuqtatırğa kiräk,”-dide Xaciyev. Ul Ärmänstannıñ tınıç xalıqqa höcümen vandallıq häm varvarlıq bularaq bäyäläde häm monıñ Azärbaycan xalqına qarata yaña genośid buluın assızıqladı. “Xärbi operaśiyälär uzuçı töbäktän yıraqtağı tınıç xalıqqa raketalar belän höcüm itü - xärbi cinayät’. Bu Ärmänstan idaräseneñ äxlaqsız qılanmışınıñ ber küreneşe,”-dide Xaciyev.

Azärbaycan prokuraturası 27nçe sentyabr’dän 11nçe oktyabr’gä qadär Ärmänstan höcümnärendä bulğan yuğaltularnı häm kürgän zararnı belderde. Älege çorda 41 azärbaycanlı grajdanlı ülgän, 205e yaralanğan. Monnan tış, 1165 öy, 57 küpqatlı yort, 146 däwlät binası qullanıp bulmas xälgä kilgän.



Bäyläneşle xäbärlär