Qırğızstanda saylaw näticäläre ğamäldän çığarıldı

Qırğızstannıñ Üzäk saylaw komissiyäse 4nçe oktyabr’dä uzğan parlament saylawlarınıñ näticälären ğamäldän çığardı. Tawış birüdän soñ ildä çualışlar başlandı. Kiçä häm bügen saylaw näticälärenä rizasızlıq belderüçe bik küp keşe uramnarğa çıqtı. Anda 1 keşeneñ ğomere özelde, 590 keşe yaralandı.  

Qırğızstan ilbaşı Sooranbay Cäänbäkov älege waqıyğalardan soñ belderü yasadı. Ul saylaw şurasına centekle tikşerü öçen kürsätmä birüen, xilaflıq açıqlanğan oçraqta, saylaw näticälären ğamäldän çığaru mäs’äläsen qarayaçağın citkerde.

Üzäk saylaw komissiyäse isä tawış birü näticälären ğamäldän çığarunı rasladı.

Qırğızstanda saylaw näticälären oşatmawçı oppoziśiyäneñ däwlät oyışmaların basıp aluı däwam itä. İldä wäzğıyät’ne kontrol’gä alu öçen Koordinaśiyä şurası tözelde. Anda êlekkege xökümät räisläre Ömürbäk Babanov belän Temir Sariyev ta urın ala. Şuranı Berdäm Qırğızstan partiyäse liderı Adaxan Madumarov citäkli.

Madumarov, jurnalistlarğa belderü yasap, Koordinaśiyä şurasınıñ maqsatı, ildäge wäzğıyät’ne kontrol’gä alu häm xoquqıy nigezgä utırtudan tış, Qırğızstan ilbaşı Sooranbay Cäänbäkov citäkçelegendäge xökümätneñ kitüen taläp itü öçen êlekkege parlament äğ’zaların bergä cıyu buluın citkerde.

Süz uñayınnan, Dastanbäk Cumabäkov räislegendäge parlament äğ’zalarınıñ bügen ber qunaqxanädä cıyılaçağı belderelde.

Demonstrantlar kiçä kiç İlbaşı sarayın häm anıñ êçendäge parlament binasın basıp alğan ide.